Read lango Yubu 2 Bible Online

Yubu 2 - lango bible

Yubu 2

¹Doŋ nino moro ocele omalaika Obaŋa obino me bino cuŋ i nyim Rwot, kun Catan daŋ tye i akinagi me bino cuŋ i nyim Rwot.

²Rwot te penyo Catan ni, “Yin kono iya i kwene?” Catan te gamo ni, “An aya rimo piny i wi lobo, kun awiwira gira iye kuno, adok tuŋŋi kede tuŋŋi.”

³Rwot dok te kobbi Catan ni, “Tye ginnoro ame itamo i kom amirona Yubu? Mom tye dano moro ame cal kede i wi lobo. En obedo dano ame mom i balloro, dok cunye atira; en lworo Obaŋa dok daŋ kwero tim luŋ areco. Cunye gire pwod ler i koma kadi bed imia awune aboŋo ginnoro ame en obalo.”

⁴Catan te kobbi Rwot ni, “Del pi del! Dano twero jalo jami mere luŋ ame etye kede pi laro kwo mere.

⁵Koŋ irye ciŋi igud cogo mere kede riŋo kome me inen kite ame ico bino cenni kede.”

⁶Rwot te kobbi Catan ni, “Aco koŋ doŋ, an atyeko jale i te twerri, cite kur igud kwo mere.”

⁷Catan doŋ te ya oko i nyim Rwot te wot cako ticcere me wuno Yubu i lwak burrogo areco meicel cakere i cuny tyene piny tuno naka i wie malo.

⁸Yubu te kwanyo abaltak me gwenyo kome, te wot bedo i buru.

⁹Dako mere te kobbe ni, “Yin pwod ilido iye-ni me bedo i cuny aler i kom Obaŋa? Yet Obaŋa ame doŋ ito.”

¹⁰Cite en te gamo dog dako mere ni, “Koppi kom rom aroma i kop ame ya i dog mon amiŋ. Wan myero obed gamo ka gin aber keken i ciŋ Obaŋa mom ogamo gin arac daŋ?” I can man luŋ Yubu naka mom otimo balloro i kop a ya i doge.

¹¹Kare ame owote a Yubu adek owinyo kop pi can man ame opoto i kom Yubu-ni, ŋat acel acel i akinagi obino baŋ Yubu, kun man ya i kan ame ebedo iye. Jonnono nyiŋgi ene: Erifaji dano me Teman, Bildad, dano me Cua, kede Jopar dano me Namat. Gin oyiko wotgi baŋ Yubu karacel, me wot nyuto cwercunygi baŋe kede kweyo cunye.

¹²Kare ame gin obolo waŋgi i kome kun pwod otye kannabor, mom oŋee, gin luŋ ote mwoco koko oko i dwon aloŋo, ote daŋ yeyeco boŋŋigi oko i komgi; ote juko kwoyo onyo i wigi malo.

¹³Gin te bedo baŋe kuno pi nino abiro, dyewor kede dyeceŋ, kun ŋattoro i akinagi mom oŋamo doge me kobbe kopporo pien gin onwoŋo oneno ni en tye kede twon rem adwoŋ meicel.