Read lango Yubu 20 Bible Online

Yubu 20 - lango bible

Yubu 20

¹Jopar dano me Naamat te gamo ni,

²“Mannono omio agam koppi, tima kica ka atamo ni myero ce mom adio cunya.

³Abedo winyo kop ame mom romo kannyere, kit ame aniaŋ kede, omio abedo tamo i cunya kite me dok iye.

⁴Mom ce iŋeo ni cakere con meicel, i kare ame oketo dano i lobo,

⁵ni lelo a lo atimo tim arac mom ri kare alac, dok yomcuny a dano a mom ŋeo Obaŋa bedo me kare anonokkoro?

⁶Kadi en odoŋo abor naka i polo twal, kadi bed wie ogudo pol,

⁷en bino to atwal calo cettere, jo ame rik onene bino penyo ni, ‘En kara tye kwene?’

⁸Bino rwenyo oko calo lek, mom dok te nwoŋere, obino ryeme oko calo gin onyuto i waŋ lek dyewor.

⁹Jo ame onene mom dok bino medo nene atwal, naka kan a en bedo iye mom daŋ bino nene.

¹⁰Otino mere bino yenyo kony i baŋ ocan, lonyo mere bino ya oko i ciŋe te doŋ oko i lobo.

¹¹Cogo mere bino nwoŋo pwod tek ata calo me awobi, cite obino yike i teko mere-nono iyi apua.

¹²“Kadi bed timo gin arac lim doge calo kic, kadi bed ekan i te lebe,

¹³‘kadi mom emito ŋulo oko, cite medde gwoko i doge,

¹⁴cite cam i yie bedo lokere i ciŋ yie kuno, te lokere doko akec calo kwir twol.’

¹⁵En mwonyo lonyo mere donyo yie, icennere te dok noko oko, Obaŋa cwaogi oko i yie.

¹⁶En bino naŋo kwir a codocodo, leb ororo en a bino neke,

¹⁷En mom bino medde neno kulo moro, kulli ame moo kic mol iye amola kede cak opoto.

¹⁸En bino dwoko gin ame en onwoŋo pi ticcere oko, mom bino mwonyo donyo i yie; mom bino yomoro cunye i ginnoro ame oya i cattere,

¹⁹Pien odio ocan te wekogi ata, omao ot ame en mom ogero.

²⁰“Pien en owor meicel, mom twero weko ginnoro a cunye omito.

²¹Mom twero camo cam te weko doŋ, mannono omio gummere mom bino perekino.

²²I kare ame en tye i jami mere a rome, nwoŋo pwod mito en ocele, peko bino bino i kome i teko mere luŋ

²³Obaŋa bino coro akemo mere agwa i kome, bino miyo cwe i kome calo kot akaka cammere, te poŋ yie doŋ odoco,

²⁴En bino riŋo ariŋa i lak nyonyo me lweny, atero mola bino cele pel apela

²⁵Bino donyo i kome te pelo i yo ŋec, lebe aryeny aryenya bino donyo i remo itao mere, twon lworo adwoŋ meicel bino make.

²⁶Piny acol icuc tye akuro lim akana mere akura, mac a mom dano en okuto bino waŋe oko, gin odoŋ i kema mere obino jwero odoco.

²⁷Polo bino yabo ballere kannaler, lobo bino twarre i kome me pide.

²⁸Pii bino tero jami ode oko, bino wayo, tero oko i nino ame akemo omako Obaŋa,

²⁹Man en gin ame Obaŋa opokki i lo arac, gin ame Obaŋa ociko ni myero en le me bedo mege.”