Read lango Yubu 21 Bible Online

Yubu 21 - lango bible

Yubu 21

¹Yubu dok te gamo ni,

²“Winy wunu koppa aber, ikwe wunu cunya i mannono,

³Di wunu cunywu, me akeb kedwu, me imedde wunu nywara ka doŋ atyeko kop,

⁴Itamo wunu ni atye ka kok i kom dano bo? Ŋo amona diyo cunya?

⁵Koŋ inena wunu, lworo bino makowu, ibino mako wunu dogwu pira.

⁶Ka aparo pire, cunya poto meicel, koyo daŋ te onyere oko i koma,

⁷Piŋo jo areco bedo kwo, kun daŋ tekogi medde ameda?

⁸Itinogi doko jo adito kun pwod okwo, ikwaegi daŋ doŋo kun gin oneno.

⁹Udigi bedo i kuc aboŋo lworo moro, lut Obaŋa mom gudogi.

¹⁰Twonigi atepo bedo nywal anywala kun tekogi mom dok piny, megi dokgi daŋ mom bwogo.

¹¹Itinogi ciro calo rommi, ka owot tuko.

¹²Owero ajaa kede opuk, cunygi yom ata ka okuto nyamulere.

¹³Karegi luŋ opoŋ i gum keken, naka odonyo piny i lyel me Ceol i kuc.

¹⁴Gin okobbi Obaŋa ni, ‘Ya oko i baŋwa! Wan mom omito ŋeyo gin ame yin imito.

¹⁵Won Twer Ducu kara obedo ŋa, ame myero owore-nono? Dok onwoŋo ŋo ka wan okwae?’

¹⁶Kara mom gumgi-nono tye pirgi kengi, an mom aromo gamo tam a jo areco kadi acel.

¹⁷“Tara a jo areco obedo neko pi kare aŋo? Ame can te poto i komgi? Ame Obaŋa te, miyogi bedo kede rem?

¹⁸Eka ote bedo calo reŋ kal ame yamo kolo, onyo acalo cuŋ kal ame yamo kolo?

¹⁹Wun ikobo wunu ni Obaŋa kano rocgi pi itinogi. Myero en culgi gin ikomgi, me oniaŋ iye.

²⁰Myero gin onen can ame opoto i komgi kede waŋgi, myero gin daŋ obil akemo a Won Twer Ducu.

²¹Kara ŋa ame gin dok paro i kom kwacgi ame odoŋ i ŋegi, ka dwete me bedogi i lobo doŋ ogik oko?

²²Ŋa ame twero pwonyo Obaŋa me bedo aryek, kun en ŋolli jo a tye malo i polo kop?

²³Jo mogo ame pwod tekogi dwoŋ ata, ame otye aber i kuc,

²⁴kun komgi moo keken, dok amurogi oŋwel olil alila,

²⁵ento jo ocele to ame cwercuny ociro oko, kun mom obilo ginnoro aber me lobo.

²⁶Obuto piny iyi apua, kun kudi omwono komgi oko.

²⁷“Nen ba, an aŋeo tamwu, kede yikwu me timo gin arac koma.

²⁸Wun ibedo penyo wunu ni, ‘Ot adwoŋ kara tye kwene? Kema a yam jo areco bedo iye tye kwene?’

²⁹Mom ibedo penyo wunu jo ame beo iyo, mom ibedo gamo wunu koppogo ame gin ko bo iyo,

³⁰ame kobo ni dano arac otwero weko i nino me can, dok ni otwero laro oko i kare me akemo,

³¹Ŋat ame twero yabo kite luŋ kannaler, dok ŋa a twero cule pi gin ame en otimo?

³²Ka-ce okano kome i bur, jo bedo kuro lyellere akura,

³³Lobo ame tye i luŋ mitte meicel, jo luŋ ciro lubo yore, lwak jo-atelo nyime mom kwanne,

³⁴Kara doŋ wun itwero kweyo wunu cunya i kop a tere mom? I kom kop ame ibedo gamo wunu luŋ, mom tye ginnoro iye kadi acel kono goba keken!”