Read lango Yubu 22 Bible Online

Yubu 22 - lango bible

Yubu 22

¹Erifaji me Teman dok te gamo ni,

²“Dano twero konyo Obaŋa i yore moro? Iyi ateni, ŋat aryek konyere kene.

³Ka ce kiteni atira, mannono twero miyo Won Twer Ducu bedo i yomcunnyoro. Onyo en twero nwoŋo ginnoro ka ce balloro mom i komi?

⁴Itamo ni en tye ka juki pien ilwore, me wek ecak ŋolli kop oko?

⁵Balli mom dwoŋ atek bo? Balli ka agikki mere mom.

⁶Pien imio omegoni ocikere nononono, dok igonyo boŋo oko i komgi ote doŋ onoro,

⁷Mom imio pii amata baŋ jo ool, itwono jo ame kec oneko kwon me acama,

⁸Jo atek keken en onwoŋo tye kede lobogi, kun jo ame jo pwo keken en a bedo iye.

⁹Mon a coggi oto iryemo woto cingi nono, ituro-gu bad itino kic oko.

¹⁰Mannono omio owic tye oguri oko dyere, twon lworo adwoŋ te ru maki oko,

¹¹leroni odoko acol oko, omio mom iromo neno piny, pii te mol mwonyi oko.

¹²“Obaŋa mom tye malo i polo? Koŋ inen acer ame tye malo kuno kite ame beco kede.

¹³Mannono omio itye ka kobo ni, Obaŋa kara ŋeo ŋo? Dok ni itwero ŋolo kop i kan acol bo?

¹⁴Pol ocido wumo kome oko, ame mio en mom twero neno piny. En woto naka i lak polo.

¹⁵Pwod itwo giri atwoa i yo acon, yo ame jo otim tim areco bedo lubo?

¹⁶Rik obin occogi oko kun karegi mom ru oromo, acakki tere ame gin ocibo pii omolo oko.

¹⁷Gin okobbi Obaŋa ni, ‘Ya oko i baŋwa’, dok ni, ‘Ŋo ce ame Won Twer Ducu twero timo i komwa?’

¹⁸Kadi amannono, en mio jami abeco poŋ i udigi, an mom aromo gamo tam a jo areco kadi acel.

¹⁹Jo a kitegi atira neno i yomcuny, jo a mom i balloro nyerogi apala apala,

²⁰kun okobo ni, ‘Omio doŋ nyiŋ okworwa orwenyo oko i wi lobo, gin ame gin oweko mac owaŋo oko.’ ”

²¹“Note Obaŋa, me ibed i kuc, bino miyo gin aber bino i ciŋi.

²²Gam pwonnyere, gwok kop a en okobbi i cunyi.

²³Ka ce idwogo baŋ Won Twer Ducu kun ibedo mwol nyime, ka ce mom iye kite a mom atira obedo i kemani luŋ,

²⁴ka ce iketo jabu piny iyi apua, kede jabu me Opir i akina gweŋe i cuny kulo,

²⁵dok ka Won Twer Ducu en a tye acalo jabuni, kede ryalli ame imaro meicel,

²⁶cunyi bino bedo yom i kom Won Twer Ducu, ite tiŋo waŋi malo baŋ Obaŋa.

²⁷Yin ibino kwaye, en bino winyo kwacci, yin ite cobo kwoŋ a rik ikwoŋo.

²⁸Ginnoro luŋ ame ibino timo bino cobere aber, nyimi bino bedo aler.

²⁹Pien Obaŋa dwoko jo ame wakere piny, cite en laro jo amwol.

³⁰En laro jo a mom i balloro, en bino lari pien ciŋi cil.”