Read lango Yubu 23 Bible Online

Yubu 23 - lango bible

Yubu 23

¹Yubu dok te gamo ni,

²“Kokona tin daŋ pwod kec, kadi cur ocira oko, ciŋe pwod onua oko.

³Kono onwoŋo aŋeo kan ame myero anwoŋe iye, ame twero miyo awoto naka kan a en bedo iye, do ber,

⁴Onwoŋo atwero pido koppa i nyime, ate rado koppa luŋ i nyime.

⁵Onwoŋo atwero winyo kite ame en twero gamo kede koppa, ate niaŋ gin ame en bino kobba.

⁶En kono opyem keda i twerrere luŋ? Pe gire, en kono oketo cunye i winyo koppa.

⁷Ŋat ame kite atira onwoŋo oromo laro kede kop kuno, aŋol koppa kono omio aloo kop atwal.

⁸“Nen, an awoto anyim, cite en mom tye kuno, adok-gu ceŋ, mom atwero nwoŋe,

⁹Ayenye naka i ciŋa tuŋ cam, mom atwero nene, alokere tuŋ cem daŋ, ento mom aneno,

¹⁰Cite en ŋeo yo ame an alubo, ka ce en otema, abino wok odoco calo jabu,

¹¹Tyena doŋ omoko oko i yore, abedo lubo yore keken kun mom agak teŋe.

¹²Mom aweko gwoko cik ame en ociko kede doge, kop luŋ ame en okobo akanogi luŋ i cunya calo lonyo.

¹³En mom lokere, kara ŋa ame romo loko tammere? Gin ame en mito, en ame en tio,

¹⁴En gire bino cobo gin ame en oyiko pira, kodi jami acalo mannono tye apol i cunye.

¹⁵Mannono mio koyo onyere i koma meicel i nyime, ka atamo pire lworo maka meicel.

¹⁶Obaŋa omio cunya opoto meicel, Won Twer Ducu omio koyo oonyere i koma meicel.

¹⁷Pien colpiny orida doŋ oko, piny acol icuc owumo waŋa oko.”