Read lango Yubu 24 Bible Online

Yubu 24 - lango bible

Yubu 24

¹“Piŋo kara Won Twer Ducu en a gwoko kare me ŋolo kop, doŋ pino jo ame ŋec, mom neno nino mere-nono?

²Dano tye ka koko bo apok waŋ kio oko, omao dok a jo ocele ote cako kwayo.

³Oryemo kana otino kic, omio dako a cware oto jeno twonnere baŋgi,

⁴Ocan daŋ pono apona, pien oryemogi oko i yoe adoŋo,

⁵Koŋ inen doŋ owoto i ka tic, kun orom aroma i kana me tim, oyenyo cam me acamagi i tim ata, pi itinogi ame nwoŋo kec ociro.

⁶Obedo rayo camgi araa i potti a jo, odedepo daŋ nyig olok a jo areco.

⁷Obuto komgi nono dyewor luŋ, i kare me koyo daŋ mom otye i ginnoro me geno komgi.

⁸Kot ame ya i wi kiddi pwodogi, ote kwako kor gweŋ keken pien ka gwokere nwoŋo pe,

⁹Tye daŋ jo akwanyo otino kic oko i kor totogi, dok daŋ ogamo otino ocan me ajeŋa i banya,

¹⁰Owoto onoro aboŋo boŋo moro i komgi, owutte arita kal apek meicel kun kec ocirogi oko,

¹¹Obedo biyo moo jeituni i potti a jo areco, obedo nyono olok i bar kun oryo ocirogi oko,

¹²Twaro a jo oto winyere kun pello i tuŋ boma, dano owane kok ni kono okonye, kadi amannono Obaŋa gire paro pi winyo kwacgi.

¹³“Tye daŋ jo mogo ame dag neno lero, ame mom ŋeo tic i lero, olworo tiyo tic kede oko,

¹⁴Anek ya iwor me wot neko ocan kede ŋat a piny oloo, dyewor en nwoŋo tye acalo akwo.

¹⁵Acod cot daŋ kuro piny doko iribiribi, kun kobo ni, ‘Ŋattoro mom bino nena; eka te geno waŋe oko.’

¹⁶Dyeceŋ gin obedo cegere acega i ot, kun mom oneno waŋ ceŋ, ento dyewor ote bedo turo udi a jo.

¹⁷Pien piny acol icuc bergi calo odiko, colpiny a jo lworo-ni, gin omaro meicel.

¹⁸“Wun ikobo wunu ni, ‘Pii gire mollogi oko oyotoyot, lobogi oceno doŋ oko, apakaca moro mom yenyo tic i poto olokgi.’

¹⁹Ceŋ kede lyeto meo pii oko, amannono daŋ, abalo rwenyo oko i lyel.

²⁰Wi jo te wil oko i komgi i dye boma, kun ŋattoro mom dok poyo nyingi kadi acel.

²¹“Owuno mon oraŋa, a mom onywal meicel, mom daŋ otimo ginnoro aber baŋ mon a coggi oto.

²²Ento Obaŋa i teko mere medde me miyo wegi twer perakino, oya malo kun cunygi doŋ oya oko me bedo kwo.

²³En gwokogi kun daŋ konyogi, kun ciko waŋe i gin ame gin timo.

²⁴Otinogi malo kare anok ote rwenyo oko, oner ote two oko calo doo, oŋolo wigi oko calo kal.

²⁵Ka ce mom amannono, ŋa atwero nyuto ni an agoba, kun cimo ni gin ame akobo mom tye kakare.”