Read lango Yubu 28 Bible Online

Yubu 28 - lango bible

Yubu 28

¹“Ateni, bur ame okunyo ryal iye tye, kede kan olio iye jabu.

²Nyonyo okunyo i lobo, mola ya i kom gweŋe.

³Dano yenyogi aboŋo paro pi piny acol, obedo yenyo naka i agikki lobo, oyenyo gwen i mutu ame col icuc.

⁴Okunyo bur i luŋ kan a jo mom beo iye, jo ame woto i yo wigi wil oko i komgi, oŋabogi malo kan a jo mom iye ote bedo lyero kuno,

⁵Aco lobo en ame ceko cam me acama, kun i tere piny omumuko oko calo gin amuko i mac.

⁶I akina gweŋe tye iye gwen capir, kede apua ame ya iye jabu.

⁷“Yo nono acut mom ŋeo, dok ocecu daŋ mom ru oneno.

⁸Dok tyen leyi me tim ame wakere wok-ki mom ru onyono, eŋatu daŋ mom ru obeo iye.

⁹“Dano cwao ciŋe naka i kidi atek wok-ki, muko naka twoni kiddi mogo adoŋodoŋo i tergi piny,

¹⁰Tuco yo pii beo i akina kiddi, kun waŋe bit i ginnoro luŋ me wel.

¹¹Culo yo pii daŋ oko eka pii i kulo mom te mol, en kelo gin okano kannaler oko.

¹²“Ento ryeko kara nwoŋere kwene? Dok niaŋ atut bedo kwene ba?

¹³Dano gire mom ŋeo yome wot iye, dok daŋ mom nwoŋere i lobo a jo akwo,

¹⁴Kut nam kobo ni, ‘Mom gire tye baŋa’, nam daŋ ni mom tye baŋe.

¹⁵Lim abup meicel daŋ mom romo wilo, mom tye ginnoro ame oromo wilo kede.

¹⁶Akadi jabu me Opir daŋ mom oromo poro kede, mom daŋ tye kit gweŋŋoro me wel ame oromo poro kede.

¹⁷Jabu kede gilaci mom daŋ twero bedo aroromo kede, mom daŋ oromo loko tigo ŋut me jabu ame olio aber meicel.

¹⁸Mom oromo poro i tigo moro me wel, arema onyo atar, wel me wilo ryeko malo kato me jami luŋ me wel.

¹⁹Gwen topaj ame nwoŋere Eciopia mom oromo poro kede naka jabu ame olio acil odoco daŋ mom oromo wilo kede.

²⁰“Kara ryeko doŋ ya i kwene ba? dok niaŋ atut bedo kwene?

²¹Okanne meicel ame wan ŋattoro mom romo neno, dok owumere ame winy a twarre malo mom romo neno.

²²Lyel a jo oto kede to kobo ka ni, ‘Wan owinyo ka kop i kome keken.’

²³‘Obaŋa en a ŋeo yo me wot iye, dok daŋ ŋeo kabedo mere.’

²⁴Pien en neno naka iyi agikki me lobo, en neno jami luŋ a tye piny i te polo.

²⁵Kare ame en rik omoko iye kite ame peko a yamo myero bed kede, kun nyuto kan ame pii me nam myero gik iye,

²⁶kare ame en rik oketo iye cik a mako kot, kun nyuto kit yo ame kot a mor myero lubi,

²⁷en rik oneno te tito pire, oŋio odoco, te doŋ moko ni myero bed tye.”

²⁸Obaŋa te kobbi dano ni, “Nen ba, bedo i lworo i kom Rwot en a mio ryeko, luŋŋi tim arac yo en a kelo niaŋ atut.”