Read lango Yubu 30 Bible Online

Yubu 30 - lango bible

Yubu 30

¹“Cite aman an doŋ adoko gi-anyera a jo ame ageo nennigi waŋ ceŋ, ame papagi rik aneno acalo jo apiny meicel, ame mom daŋ aromo porogi i gwogi ame gwoko rommina.

²Kony aŋo ame onwoŋo aromo nwoŋo i teko me cingi, gin jo ame teko me komgi doŋ otum oko-ni?

³Peko me kec oridogi meicel kede can, omiogi ogweno gigi mogo otwo i tim ata,

⁴obedo pwopwono pot awaca kede pot yennogo me buŋ, dok ocamo anaka lwit yen.

⁵Otye ka ryemogi oko i akina jo, ocele, jo cokogi bala jo ame acoko akwo,

⁶Obedo doŋ i akina burre mogo ame tye i luŋ, kede burrogo ocele, naka iyi aduu.

⁷Okok i buŋ calo leyi, gin luŋ ocokere karacel te okuto.

⁸Gin obedo itino a jo amiŋ ame mom ŋeo kan oya iye, jo ame rik oryemo oko i lobowa.

⁹“Aman doŋ an adoko gi-aweragi, nyiŋa doŋ mom rwenyo i doggi.

¹⁰Cunygi owuka oko, mom omito noko ŋeta kadi acel, onyeto lao i nyima aboŋo lworo moro.

¹¹Pien Obaŋa otyeko tekona odoco, omio adoko amwol oko, omio gin doŋ mom oromo jukere kengi ka otye i nyima.

¹²Owotegi tye otware i koma i ciŋa tuŋ cem, otye ka ryema oko teŋe, otye oyenyo yo me neka oko.

¹³Otwoda doŋ dyere aboŋo yo moro me put, otye ka medo can i koma ameda, aboŋo ŋattoro ame twero jukogi.

¹⁴Okato i koma calo jo abeo i dogcel alac meicel, ote bedo lora ni kuŋ kuŋ i wi odur.

¹⁵Lworo te lunyo lokere i koma an, kwogona te rwenyo oko calo gin a yamo okolo, kuc onwoŋo atye kede daŋ te rwenyo calo pol.

¹⁶“Aman doŋ cunya poto apota, kare me can doŋ otuno oko i koma.

¹⁷Koma doŋ bedo mwoda amwoda dyewor, rem doŋ mom weka kare kadi acel.

¹⁸Omako boŋona i teko meicel, orida doŋ calo ŋut kanyina.

¹⁹Obaŋa doŋ obola oko piny i coto, acalo doŋ apua onyo buru.

²⁰“An akok baŋi, ento yin mom igamo doga, ka acuŋ-gu i nyimi, mom iparo pira.

²¹Idoko doŋ ager agera i koma, iwuna meicel i ciŋi atek.

²²Itiŋa malo i yamo, ariŋo doŋ iye calo gadigadi, yamo doŋ lolla i piny kun kot amor amora.

²³An gire aŋeo ni ibino tera naka i to, i ot ame jo akwo luŋ rwatte iye.

²⁴“Kadi amannono, ŋat orette piny i wi odur myero kur rye ciŋe? Ŋat a tye i peko myero mom kok ni konye bo?

²⁵An rik mom akok pi dano a tye i can bo? Cunya mom ocwer pi ocan bo?

²⁶Rik ka ayenyo gin aber, gin arac en a lunyo bino, ka atye akuro lero, piny dok wumere awuma.

²⁷Cunya doŋ bedo poto apota kun mom koŋ kwe, kare me can doŋ obino oko me bino rwatte keda.

²⁸Arimo piny i boŋo cola, cite ŋattoro mom kweo cunya, aya-gu malo i ka cokere ate koko kony.

²⁹Ekwe en a doŋ tye acalo omegona, udu te bedo calo owotena.

³⁰Del koma doŋ cido acol icuc te bwatte oko, lyeto doŋ waŋo cogona awaŋa.

³¹Opukka doŋ odoko me goyo wer me koko, nyamulere winyere doŋ calo dwon ŋat akok.”