Read lango Yubu 31 Bible Online

Yubu 31 - lango bible

Yubu 31

¹“Atyeko doŋ cikere oko waŋa, kara dok atwero bolo i kom nyan a mom oŋeye i co i yore aŋo?

²Kara doŋ gin aŋo ame Obaŋa bino pokka malo i polo? Gin aŋo ame aromo nwoŋo me bedo mega i baŋ Won Twer Ducu?

³Can mom poto i kom ŋat a kite mom atira bo? Peko moro mom poto i kom atim tim arac bo?

⁴Obaŋa mom neno kite ame abedo kede luŋ bo? En mom kwano ginnoro luŋ ame an atimo?

⁵“Ka ce yam abedo kobo kop goba, kun koma mit me wot bwolo jo,

⁶myero pima i mijan me pimo jami kakare, me Obaŋa ŋe ni cunya ler.

⁷Ka ce yam agak oko i yo ame myero alubi, kun cunya mito timo gin ame waŋa oneno, dok ka ce toŋŋoro me bal tye i ciŋa,

⁸jo ocele en ame myero can gin ame an acoo, cam ame tye ka doŋo i potona myero put oko.

⁹“Ka ce cunya onwoŋo atera kom dako moro, ka abedo liba dako awota doggola mere,

¹⁰dakona myero wot reggi lo ocele kal, jo ocele en a myero but kede,

¹¹Pien mannono kono obedo twon bal arac meicel, bal ame oŋolkop en a myero ŋol cannere,

¹²pien mannono twero bedo rom i mac a waŋ nakanaka, ame onwoŋo twero waŋo cam ocek i potona luŋ.

¹³“Ka ce akwero winyo pido opiina onyo me aŋecana, ka ce gin okelo koko moro i koma,

¹⁴ka abino timo ŋo ka Obaŋa oya me ŋolo kop i koma? Ka en bino penyo koppere, abino gamo doge nino?

¹⁵Mom ŋat oketa i yi totta en a daŋ oketo opiina? Mom ŋat acellono en ocweo wan luŋ iyi totowa?

¹⁶“Yam atwono acannoro ginnoro ame en onwoŋo amito, onyo amio dako moro a cware oto okuro piny nono?

¹⁷Onyo ca abedo camo cema kena, kun atin kiccoro mom obilo?

¹⁸Aco an Obaŋa obedo gwoka kun pwod atidi calo pappa, en obedo tela cakere iyi totta.

¹⁹Rik aneno ŋattoto ame can boŋo ociro, onyo acannoro a mom tye i gi-wumere ame mom ate konyo?

²⁰Ka ce en yam mom okwao winyo moro pira i cunye, kun amie boŋo apek alyet ame otio i yer romo.

²¹Ka ce yam awuno ŋattoro a mom i bal, kun ageno ni oŋolkop i dogcel bino miyo aloo kop.

²²Ka ce yam atimo amannono, wi gwoka myero mukere oko i te weta, bada myero putte oko i waŋ nyor.

²³Pien an onwoŋo alworo can oya i baŋ Obaŋa, onwoŋo mom atwero tiŋo waŋa me neno kwogo mere.

²⁴“Rik aluŋo genna luŋ i kom lim bo? onyo ca rik aloko lim odoko ka larrena?

²⁵Ka ce rik cunya yom pien lonyona onwoŋo bup, onyo pien lim onya i ciŋa.

²⁶Ka ce rik aneno ceŋ kun aryeny, onyo dwe kun woto i twon kwogo mere adwoŋ,

²⁷eka ote wayo tamma me cako worogi i muŋ, kun aryeo ciŋa amotogi.

²⁸Magi-nono daŋ nwoŋo myero bed bal ame oŋolkop en a myero ŋol can pirgi, pien onwoŋo atwero bedo agoba baŋ Obaŋa ame tye malo.

²⁹“Ka ce yam alelo alela i kare ame akworra opoto i can, onyo anatte gira aŋata i kare ame gin arac opoto i kome;

³⁰aco doga gira yam mom otimo balloro i kome, pien mom alamere ni kono okwanyo kwo mere oko.

³¹Ka ce jo i kemana mom openyo ni, ‘Ŋa atye kuno ame mom ocamo riŋo oyen?’

³²Mom tye arokkoro ame obuto i dye boma ata, an ayabi jo ame woto i yo oda.

³³Mom abedo muŋo i jo gin arac ame atimo, kun akano balla i cunya.

³⁴Pien an onwoŋo abedo lworo lwak atek meicel, rik mom abedo liŋ aliŋa kun mom adonyo oko i oda, pi lworo acae a jo me doggola moro.

³⁵Kono onwoŋo tye ŋattoro ame winyo koppa! An en doŋ aketo ciŋa oko-ni, ‘Won Twer Ducu myero doŋ gam doga.’ Kono akwora onwoŋo ocoo kop edota kede acoa.

³⁶Kono onwoŋo gire mom orwenyo i wi gwoka, kono abedo yon kede ayona calo tok kwogo.

³⁷Kono atitte ginnoro luŋ amako kwona, kono abino i nyime calo rwot.

³⁸“Kono lobbna yam obedo kok i koma, dok waŋ kia luŋ iye daŋ okok i koma karacel,

³⁹kono yam abedo camo gin ocek iye aboŋo culo ginnoro pire, ate miyo-gu wegi mere to oko,

⁴⁰dok ate miyo okuto tu iye akaka ŋano, kede onyekmon akaka kal.” Kop a Yubu doŋ ogik oko kan.