Read lango Yubu 32 Bible Online

Yubu 32 - lango bible

Yubu 32

¹Jo adek-ki mom dok omedde gamo doŋ Yubu, pien en oŋeo gire ni kite atira.

²Mannono te miyo akemo mako Eliku wot a Barakel, dano me Buj, me doggola a Ram oko. Akemo onwoŋo omake i kom Yubu ni pien en tye ka dwore kene ni koppere en atira, akato Obaŋa.

³Akemo daŋ onwoŋo omake i kom owote a Yubu adek ca, pien gamo kop a Yubu oloogi oko, omio oweko Obaŋa pwod nen acalo abal.

⁴Eliku obedo liŋ kare alac kun mom gamo dog Yubu pien gin luŋ onwoŋo odito okate oko.

⁵Cite i kare ame Eliku oneno ni jo adek-ki mom doŋ agamo kop a Yubu, akemo te make oko.

⁶Eliku wot a Barakel me Buj te cako gamo kop ni, “An kono pwod atidi, cite wun doŋ ibedo wunu jo adoŋo, mannono omio woki an abedo kede lworo, mom adio cunya me titiwu gin ame aŋeo,

⁷An abedo kobo ni, ‘Wek jo oteggo kob kopgi, jo a mwakagi bup kobo kop me ryeko.’

⁸Cite cuny ame dano tye kede, ame obedo wee a Won Twer Ducu, en a mio dano niaŋ kop.

⁹Mom jo oteggo en aryek, mom daŋ jo oteggo en a niaŋ gin a tye kakare.

¹⁰Mannono akobbiwu ni, ‘Winy wunu koppa; weka wunu an daŋ anyuttiwu tamma.’

¹¹“Nen ba, an abedo diyo cunya winyo kop ikobbo wunu, abedo ciko yita winyo kop me ryeko, kun atye ka yenyo kop me akoba.

¹²An onwoŋo ajalo tamma luŋ baŋwu, nen ba, ŋattoro i akinawa mom oloo Yubu.

¹³Gwokere wunu ba, me kur ikob wunu ni, inwoŋo wunu ryeko, Obaŋa gire en a myero loc, mom dano.

¹⁴Kop ame en obedo kobo mom onwoŋo okobo baŋa, mannono omio mom abino gamo koppere i kodikop ame ibedo kobbe wunu.

¹⁵“Doggi te two oko, mom ogamo doge kadi acel, kop a myero okob te loyogi oko.

¹⁶An myero abed diyo cunya kun akurogi ame gin oliŋ aliŋa, pien gin luŋ ocuŋ kuno kun mom dok ogamo kopporo?

¹⁷An daŋ kon doŋ abino culo kop, an daŋ myero doŋ akob gin ame aŋeo.

¹⁸Pien an daŋ kop dwoŋ i cunya atek meicel, mom doŋ aromo diyo cunya kadi acel.

¹⁹Nen ba, cunya doŋ calo koŋo olok ame owumo wie oko, calo ocoe anyen ame amito yec oko.

²⁰Mito akobi omi obed aber, myero anam doga, agam kop.

²¹Mom abino leŋere kadi acel baŋ ŋattoro, mom daŋ abino pako ŋattoro.

²²Pien an mom aŋeo pako jo, kono nyo ŋat ocwea oneka oko con.”