Read lango Yubu 33 Bible Online

Yubu 33 - lango bible

Yubu 33

¹“Aman doŋ ba, adwoŋ Yubu winy koppa, ter yiti iwiny kop akobo luŋ.

²Nen an doŋ acako kop oko, leba doŋ ocako lebo kop oko.

³Koppa nyuto ni cunya ler, gin aŋeo, leba bino kobo kite aŋeo kede ikokome.

⁴Cuny Obaŋa en oketa gira, weo a Won Twer Ducu en omia weo me kwo,

⁵Gam koppa ka ce itwero, rye koppi luŋ i yore i yore i nyima, nwoŋ ka cuŋŋi,

⁶Nen ba, an arom aroma kedi nyim Obaŋa, an daŋ ocwea i lobo.

⁷Nen ba, kur komi myel pi lwora, ciŋa mom bino nuyi okato kare.

⁸“Ateteni, yin gire ikobo kop i yita, atyeko doŋ winyo kop ame ikobo luŋ.

⁹Yin ikobo ni yin icil, dok rocci moro mom, ni yin icil odoco, dok balloro momi komi,

¹⁰Dok Obaŋa bedo yenyo kop i komi, dok tye ka teri acalo akworrere;

¹¹en doŋ orwako tyeni oko iyi kol, kun neno kabedo luŋ ame yin iwoto iye.

¹²“Nen ba, an atwero gamo mannono, ni yin mom ikobo kakare.

¹³Obaŋa dwoŋ kato dano oko, Piŋo yin imito pyem kede kun ikobo ni, ‘En gire mom bino gamo koppa moro ame an akobo’?

¹⁴Pien Obaŋa kobo koppere i yore apapat, kadi bed dano mom niaŋ iye.

¹⁵Bino i waŋ lek, iyi anyuttogo ame nen dyewor, i caa ame nino mit kede wok-ki, kun nino oyuto waŋgi i kabutogi.

¹⁶Mannono en kare ame en muno kede i yit dano onino, kwenyorogi i yore ame mio komgi myel,

¹⁷me dano lokere wek timo gin arac, wakere mere daŋ gik oko,

¹⁸en a laro tipo a dano i lyel, gwoko kwo mere me mom neke i pala lweny.

¹⁹“En goo dano daŋ i rem i kabuto mere, kun mio kome mwode kare ducu,

²⁰ame mio cunye mom mito cem, mittere me cam te rwenyo oko.

²¹Cako jony tuno ka riŋo i kome orwenyo oko ducu, cogo mogo i kome a yam mom nen cako doŋ guŋo oko.

²²Kwo mere nwoŋo doŋ ceggi acega i lyel, dok nwoŋo daŋ ceggi acega i ciŋ anek jo.

²³“Ka ce amalaika nwoŋo mom tye ame ocuŋ pire, ame tye i akina omalaika tutumia i tutumia, ame ticgi me noto dano kede Obaŋa, me nyutti dano gin aber ame myero etim,

²⁴amalaika mere-nono twero time kica kun kobo ni, ‘Larre, me en kur wot piny i lyel, en doŋ otyeko nwoŋo gin me lakoro kwo mere.

²⁵Mi riŋo kome roc dok anyen calo me atin, dwogo teko mere obed kite ame rik tye kede a pwod en awobi.’

²⁶Dano-nono doŋ cako kwayo Obaŋa, Obaŋa te gamo kwaccere, dano doŋ twero bino i nyim Obaŋa i yomcuny. Dano doŋ cako tito kite ame elarre kede baŋ jo.

²⁷En wero wer i nyim jo kun kobo ni, ‘An rik abalo, ate gak weko timo gin a tye kakare oko, cite Obaŋa mom oketo can i koma a romi gin atimo.’

²⁸En olakoro kwona mom owoto piny i lyel, pwod oye an amedde bedo kwo kun aneno lero.

²⁹“Nen ba, Obaŋa timo jami magi luŋ, en bedo lolle i dano kittono kare i kare,

³⁰me wek ekwany kwo mere oko i lyel, me dano nen ceŋ me kwo.

³¹“Ter yiti, Yubu, me iwiny koppa, liŋ mot me akob koppa.

³²Ka ce itye kede kopporo ame imito kobba, kobi, pien bino miyo abedo i yomcuny ka aniaŋ ni i mom i balloro.

³³Ka ce kopporo pe, yin doŋ winy koppa, liŋ mot, me apwonyi kede ryeko.”