Read lango Yubu 34 Bible Online

Yubu 34 - lango bible

Yubu 34

¹Eliku dok te kobo ni,

²“Winy wunu koppa, wun jo aryek, cik wunu yitwu iwiny wunu, wun jo ame tye kede ŋec;

³pien dano temo kop kede yite, kite ame en bilo kede cam i doge.

⁴Myero oyer wunu gin ame tye kakare, myero omok wunu mene ame tye aber.

⁵Aman Yubu doŋ otyeko kobo ni, ‘An balla moro mom, cite Obaŋa ogamo twer ame atye kede oko;

⁶bur ame tye i koma mom romo caŋ, kadi bed mom abalo ginnoro.’

⁷Tye ŋattoro ocele acalo Yubu, ame mato acac calo pii,

⁸ame nywako yo otim tim areco, dok woto karacel i jo areco?

⁹Pien en otyeko kobo ni, ‘Bedo tiyo gin ame yomoro cuny Obaŋa, mom gire konyo dano i ginnoro.’

¹⁰“Pi mannono ba, winy wunu koppa wun jo ame tye i niaŋ atut, Obaŋa mom twero timo gin arac kadi acel, Won Twer Ducu mom timo ginnoro a mom tye kakare.

¹¹En keto can i kom dano a rom i bal ame en otimo, dok en tero dano acel acel kun lubo kit kwo mere.

¹²Ateni Obaŋa gire mom romo timo ginnoro arac, Won Twer Ducu mom twero ŋolo i yore a mom atira.

¹³Ŋa omio lobo obedo i te loccere, dok ŋa omio wi podo luŋ obedo i te twerrere?

¹⁴Kono en te kwanyo weo mere oko i lobo, te miyo yamo mere a jo wao cokere luŋ baŋe,

¹⁵ginnoro luŋ akwo te to awaŋe acel, dano te dok oko iyi apua.

¹⁶“Ka ce itye wunu i niaŋ atut, winy wunu kop man, winy wunu kop ame akobo.

¹⁷Ŋat ame mom mito ni ŋol kop atira twero bedo aloc? Yin itwero ŋolo kop loo dano a kite atira ame tye i twer,

¹⁸ŋat a twero kobbi abaka ni, ‘Yin konnyi pe’, onyo baŋ aloccoro ni, ‘Yin i dano arac;

¹⁹ame mom dworo rwottoro, onyo ame mom paro pi alonyo kato acan, pien gin luŋ obedo tic me ciŋe?’

²⁰Dano twero to i kare moro keken, Obaŋa twero goyo rokkoro-ni i cuny dyewor te miyogi rwenyo oko, twoni jo atek ote daŋ tero oko kun ciŋ dano moro mom ogudo.

²¹“Pien waŋe mom rwenyo i kom gin ame dano timo, en neno kan ame en woto iye luŋ.

²²Mom tye mutu moro onyo kan acol icuc, ame otim tim areco romo pono iye.

²³Obaŋa mom oketo kare pi dano moro, me wot i nyime wek eŋolle kop.

²⁴En turo dito a wegi twer aboŋo yenyo kop i komgi, eka te keto jo ocele me leyo kakargi.

²⁵Pien nwoŋo en ŋeo ticgi luŋ, twero retogi i dyewor acel keken twergi te gik oko,

²⁶En pwodogi i nyim lwak, pi gin areco ame gin otimo,

²⁷pien nwoŋo gin ogak ote weko lube oko, kun mom dok oparo kadi acel pi timo gin ame en mito

²⁸mannono mio gin omio koko ocan winyere baŋ Obaŋa en te winyo koko a jo ame owuno.

²⁹“Ka ce Obaŋa oliŋ gire mot, ŋa a twero kobo ni en otimo bal? Ka ce en okanne gire oko, ŋa a romo nene? Rokkene onyo ŋa ame romo nene?

³⁰Gin gire mom oromo geno dano a mom lworo Obaŋa me bedo aloc, onyo me bedo owic me ciko lwak.

³¹“Tye ŋattoro ame yam koŋ okobo baŋ Obaŋa ni, ‘An onwoŋo agak oko, cite mom dok abino nwoyo timo bal.’

³²Pwonya i gin ame an mom ru aneno, ka ce yam atimo bal, mom dok abino nwoyo timo?

³³Myero en ket can i komi ame opori, pien rik ikwero oko?

³⁴Pien yin gire a myero iyer, mom an. Yin myero itit gin ame iŋeo.

³⁵Jo ame niaŋ atut kede oryeko ame owinyo koppa, gin luŋ obino kobba ni, ‘Yubu tye ka kobo koppere atata aboŋo ŋeccoro, kop ame akobo luŋ mom tye iye ginnoro me ryeko.’

³⁶Kono obedo temo Yubu kittono naka iyi agikki, kono ber, pien tye ka gamo kop acalo otim tim areco,

³⁷Tye dok amedo tim me jem i kom ballere, tye-gu ababapo ciŋe nononono i akinawa, tye ka miyo koppere me anywar i kom Obaŋa medde ameda.”