Read lango Yubu 35 Bible Online

Yubu 35 - lango bible

Yubu 35

¹Eliku dok te medde i koppere ni,

²“Pwod itye ka tamo ni koppi en a tye kakare? Yin itye ka kobo ni, ‘Twer ame itye kede ennono i nyim Obaŋa,’

³omio itye ka kobo ni, ‘Kara nwoŋo atimo ŋo i komi? An akati i yore a ŋo ka ce an onwoŋo abedo timo bal?’

⁴An abino gamo koppi kit man, karacel kede owoteni daŋ.

⁵Koŋ itiŋ waŋi inen polo, koŋ inen pol ame tye malo meicel kati oko-ni.

⁶Ka ce ibalo, gin aŋo ame nwoŋo yin itimo i kom Obaŋa? Dok ka balli doŋ omedde dwoŋ meicel, ŋo ame nwoŋo yin itimo i kome?

⁷Ka ce kiteni atira, nwoŋo imie gin aŋo kono? Onyo ŋo ame nwoŋo ogamo i baŋi?

⁸Gin arac ame itimo gudo dano wadwu ame cal kedi, kiteni atira daŋ konyo dano.

⁹“Jo cako koko pien nwoŋo doŋ owunogi meicel, ocako lwoŋo ni myero konygi pien ciŋ wegi twer nwoŋo doŋ ocirogi oko,

¹⁰Cite mom tye ŋattoro ame koŋ penyo ni, ‘Obaŋa ame oketa kara tye kwene ba, ame mio jo wero naka dyewor,

¹¹ame pwonyowa kato leyi ame tye i wi lobo, ame miowa obedo aryek akato winy ame twarre malo?’

¹²Gin okok baŋe i kuno, cite en mom gamo doggi, pi wakere a jo areco,

¹³Obaŋa gire mom winyo koko ame tere mom, Won Twer Ducu mom gire paro apara pire,

¹⁴Kara doŋ yin kono ka ikobo ni mom inene, ka ikobo ni pidoni tye i inyime, yin itye ka kuro!

¹⁵Yin itamo ni Obaŋa ka akemo omako mom keto can i kom dano bo, dok en mom gire paro pi bal wok.

¹⁶Yubu ŋamo doge i kop atata, duro-gu kop aboŋo ŋeccoro.”