Read lango Yubu 36 Bible Online

Yubu 36 - lango bible

Yubu 36

¹Eliku omedde i koppere, kun kobo ni,

²Di cunyi anonok me koŋ anyutti, pien pwod atye i gin a myero akob akaka Obaŋa.

³Abino tic i ŋec ame atye kede luŋ me nyuto ni ŋat ocweowa timo gin a tye atira.

⁴Me ateni, kop ame akobo-ni goba mom iye, ŋat a tye i ŋec aber odoco tye kedi.

⁵“Nen ba, Obaŋa tye kede twer, dok en mom cao ŋattoro, en tye kede twer ame ocuŋ i kom ŋec atut ame tye kede.

⁶En mom weko jo areco bedo kwo nakanaka, cite jo ame owuno en miogi twerogi a myero obed kede.

⁷Waŋe mom rwenyo i kom jo a kitegi atira, en ketogi ka loc calo obakki, gin te bedo malo kuno nakanaka.

⁸Cite ka otweogi kede jegere, ote ridogi oko i tol me awuna wuna,

⁹eka en te tittigi ticgi, kede rocgi, ni gin otye ka wakere.

¹⁰En mio yitgi yabere me winyo pwony, en te cikogi ni myero owek timo bal.

¹¹Ka ce gin owinyo koppere ote cako wore, otyeko karegi odoŋ i yomcuny, kun otye aber,

¹²Cite ka ce gin okwero winyo koppere, oto i pala lweny, kun oto-gu aboŋo ŋeccoro.

¹³“Jo ame kop Obaŋa mom tye i cunygi, okano akemo i cunygi, ka ce en otweogi, gin mom okok baŋe.

¹⁴Kodi jonnono to con kun pwod otino, kun oto daŋ i lewic.

¹⁵Obaŋa laro jo owuno i can opoto i komgi-nono, en tio i can opoto i komginono me yabo waŋgi.

¹⁶“En omio iya oko i can, en oteri kan alac ame ginnoro mom tye iye ame dii, dok icamo iye gin amio keken.

¹⁷Cite aman itye ka nwoŋo kit cannoro luŋ ame oketo i kom otim tim areco, aman can ame oketo i komi doŋ omaki oko.

¹⁸Doŋ myero igwokere ba, me akemo kur mi idok anywar, can apek ame oketo i komi me lakoro yin kur mi igak oko,

¹⁹Koko gire mom romo kwanyo can i komi, kadi bed iket teko rom mene.

²⁰Kur ibed paro dyewor, ame en kare ame omio nyiŋ rok apol rwenyo oko i wi lobo.

²¹Gwokere ba, kur ilokere idok itimo bal, pien mannono en okelo peko i komi.

²²“Nen ba, teko Obaŋa dwoŋ meicel, ŋa kara obedo apwony a rom aroma kede?

²³Ŋa a yam koŋ obedo telo Rwot, onyo ŋa ame twero kobbe ni, ‘Yin itimo bal?’

²⁴“Myero ipo pi pake pi ticcere, ame cakere con jo obedo pake pire i wer.

²⁵Jo luŋ doŋ oneno gin ame en otio, cite mom tye ŋattoro ame niaŋ iye aber.

²⁶Nen ba, Obaŋa dwoŋ meicel ame wan mom oromo neyo, dok mwaka ame en ori kede mom romo kwanne.

²⁷“Pien en mio pii duny i piny i lobo, te dok ton calo kot,

²⁸ame ya i pol corre piny i lobo, te ony adwoŋ meicel i kom jo,

²⁹Tye dano moro ame twero niaŋ kite ame pol oyarre kede, onyo kite ame kot mor kede i pol?

³⁰Nen ba, en mio lutkot meny tuŋŋi i tuŋŋi, te wumo wi kiddi oko.

³¹Mannono kite ame en pito kede rok luŋ, kun miogi cam adwoŋ meicel.

³²En mako lutkot i ciŋe, te ciko ni cel kan ame en amito ni cel ikokome.

³³Mor a kot tito pi bino mere, i twon ryeko kede akemo pi bal.”