Read lango Yubu 37 Bible Online

Yubu 37 - lango bible

Yubu 37

¹“Man daŋ poto cunya meicel, etaona dipere bala amukere oko i kakare.

²Koŋ iwiny wunu kite ame dwone amor kede, kede kite ame kop a donnyo doge tye ka ŋur kede,

³En mio romo te polo luŋ, kun lutkottere meny menyo kabedo luŋ.

⁴Icennere dwone te cako mor, dwone mor aloŋo i twon kwogo meicel, en mom juko meny a kot kare.

⁵“Dwone mor i yore me awura meicel, dok en timo twoni gigi mogo adoŋodoŋo ame wan mom oromo niaŋ iye.

⁶En twero ciko pee ni myero corre piny i lobo onyo ciko kot ni corre piny adwoŋ meicel.

⁷En twero juko tic a dano oko, me wek jo luŋ ŋe ni en etye etic.

⁸Leyi luŋ dok i ka ponogi, ote doŋ bedo gigi i gorogoro.

⁹Yamo ajuru kodo kun ya i ode, eka yamo akeketa te kelo koyo anic meicel.

¹⁰Ewura dog Obaŋa mio pii makere doko pee, eka te miyo makere atek ikaŋ.

¹¹En mio pii cokere adwoŋ i pol, eka lutkot doŋ te cako meny iye kuno,

¹²gin te bedo wirre tuŋŋi kede tuŋŋi kun Obaŋa telogi iye, me cobo ginnoro luŋ ame Obaŋa ocikogi ni myero oti, wi lobo luŋ kan ame dano twero bedo iye.

¹³En timo mannono pi keto can i kom dano onyo pi konyo lobo mere, onyo pi nyuto marre.

¹⁴“Yin Yubu myero iwiny kop man, koŋ icuŋ mot me ipar pi tic Obaŋa me awura.

¹⁵Yin iŋeo kite ame Obaŋa miogi kede cikkere, eka te miyo lutkot meny i pol menyo piny?

¹⁶Yin iŋeo kite ame en omio pol ocuŋ kede kakargi? Mannono obedo tic me awura meicel, tic a ŋat a ŋeccere malo okato kare.

¹⁷Yin gire mom iŋeo ginnoro kono ka lyeto keken ka boŋoni oobere, ka yamo ame kodo i tuŋ anyarolum omio lobo okwe.

¹⁸Yin iromo konyo Obaŋa i ryeyo pol, ame te bedo atek calo mola ame otwako?

¹⁹Koŋ ipwony wunu gin ame wan obino kobo i nyime, wan mom oromo pido nyime pi kwiya pinywa.

²⁰Myero bin kobbe ni an abino kop? Dano twero kobo pire kene ni neke oko?

²¹“Aman ceŋ tye acaro waŋwa acara, tye aryeny acil meicel ame mom romo anena, polo tye anen acil pien yamo otero pol oko.

²²Lero a ceŋ tye aryeny acil calo jabu i tuŋ anyarolum, kwogo Obaŋa omio lworo ocirowa oko.

²³En Won Twer Ducu ame wan mom oromo noko ŋete, teko mere dwoŋ atek i ŋolo kop atira, dok kite daŋ atira odoco ame mom romo wuno ŋattoro.

²⁴Mannono omio dano lwore, en mom paro pi jo ame yeyea ni oryek.”