Read lango Yubu 38 Bible Online

Yubu 38 - lango bible

Yubu 38

¹Rwot te gamo dog Yubu yamo ajuru ni,

²“Man kara ŋa ame mito ni ewum tamma nie, kun kono en mom ŋeo ginnoro kadi acel?

³Twe pyeri i del ikiŋ calo amony, yikere gamo penya ame apenyi kede.

⁴“Yin rik itye kwene i kare ame acibo acakki me lobo? Koŋ ititta, ka ce yin iŋeo ni itye i niaŋ atut.

⁵Kara ŋa omoko kite ame laccere kede borrere myero bed kede? Yin gire iŋeo man aber! Ŋa ame oryeo tol me pimo?

⁶Pagi me tergi ocuŋ i kom no? Ŋa ocibo kidi me gwiccere,

⁷kare ame acer luŋ me odiko wero karacel, dok itino Obaŋa luŋ redo yomcuny.

⁸“Ŋa ame twero cego pii nam doggola, kare ame doŋ oyeco yo mere oko i ot nyodo mere i lobo.

⁹I kare ame rik amio pol oburo kome oko calo boŋo, kun pol ocido icuc owumo kome oko?

¹⁰I kare ame anyuto ka gikkere, ate cego oko i kika kede arii nyonyo,

¹¹ate kobo ni, ‘Ibino tuno kan, cite mom ibino kato, tugere-ni ame iwakere kede awaka wok-ki bino gik oko kan.’

¹²“Yam koŋ iciko odiko me cako ticcere, cakere i kare ame icako bedo kwo, onyo inyutti ru-piny kabedo mere?

¹³Yam koŋ iciko ru-piny me yabere romo kabedo luŋ i wi podo, me wek jo areco teŋere oko i ka ponogi?

¹⁴Ru-piny mio jami ducu nen oko kannaler, calo boŋo aruka ame calo gulu ame okekedo i rani apapat tye iye.

¹⁵Ler a piny a jo areco te rwenyo oko i baŋgi, ciŋgi ame ogoo kede jo te giko ticgi oko.

¹⁶“Yam koŋ iwoto naka kan a nam ocakere iye, onyo itemo koŋ wot i tyeni i te pii piny?

¹⁷Yam koŋ onyutti doggola me to bo, onyo yam koŋ ineno doggola me kan acol icuc?

¹⁸Yin iŋeo kite ame wi podo luŋ lac kede? Koŋ doŋ ikob do ka ce iŋeo mannono luŋ?

¹⁹“Yo ame woto kan a lero bedo iye tye kwene? Ane kan ame piny ocido icuc bedo iye?

²⁰Itwero nyuttigi kan a myero gin wot gik iye, onyo itwero nyuttigi yo dokgi ceŋ i kabedogi?

²¹Aŋeo ni yin gire iŋeo, pien yin iteggo, i kare-naca onwoŋo doŋ onywali oko.

²²“Yam kon idoŋo i ot kano pee aŋic? Onyo ineno ot kano pee apekkege

²³ame pwod ogwokogi me kuro kare me ayela, pi kuro kare me lweny?

²⁴Ane yo ame woto kan ame opoko iye lero i kabedo apapat, onyo kan ame oketo iye yamo me tuŋ kide i kabedo ducu?

²⁵“Kara ŋa a yam oyeco yo ame kot corre kede i lobo, kede yo me mwoc a lutkot?

²⁶Ŋa a mio kot cwe kan a jo mom bedo iye, kede i tim ata kan ame dano moro mom iye?

²⁷Ŋa a mio kot bido lobo otwo ame ginnoro mom iye, ame te miyo lum cako tu iye?

²⁸“Papa a kot daŋ tye? Ŋa onywalo toyo ce?

²⁹Pii omakere calo pee oya iyi ŋa? Ŋa onywalo pee acalo toyo ame oya i polo?

³⁰Pii makere doko atek calo gweŋ, naka pii me nam daŋ makere oko.

³¹“Itwero tweyo acer ame olwoŋo ni lyer-nino, onyo itwero gonyo tol ame otweo acer ocokere karacel?

³²Itwero miyo acer luŋ bedo tye i kakargi ikokome, onyo itwero telli acer ame olwoŋo ni ajaraŋuu kede itino mere yo?

³³Yin iŋeo cik ame otio kede i polo? Itwero moko cik pirgi i lobo kan?

³⁴“Itwero miyo dwoni winyere naka i polo, me pii adwoŋ corre i komi wumi oko?

³⁵Yin itwero oro lutkot ni wot memenya, kan imito, eka en daŋ te ye, kun ogamo ni, ‘An ene adwoŋ?’

³⁶Ŋa oketo ryeko i pol, onyo ame omio ŋico tye kede niaŋ atut?

³⁷Ŋa aryek ame romo kwako pol, onyo ŋa a romo leŋo dog opoko me pii me polo te miyo kot cwe,

³⁸apua te lokere doko coto, lobo te makere karacel atek ateka.

³⁹“Yin iromo dwaro riŋo me acama pi eŋatu, onyo itwero miyo itino eŋatu yen,

⁴⁰kun gin tye okudde i gorogorogi, onyo ka gin obusto mot kun okuro lee me amakagi?

⁴¹Kara ŋa a mio agak cammere, ka ce itino mere tye akok baŋ Obaŋa kun otye orimo piny pi yenyo cam?”