Read lango Yubu 39 Bible Online

Yubu 39 - lango bible

Yubu 39

¹“Yin iŋeo kare ame dyegi abedo i wi got nywal iye? Yam koŋ ineno min atilloro tye anywal?

²Yin iŋeo kare ame gin tyeko, kun iŋeo kare me nywalgi ikokome?

³Iŋeo kare ame gin nyoye kede piny colo itinogi, eka ote nywalo iye otinogi?

⁴Itinogi doŋo i bar kun komgi yot, kare ame oya i baŋgi owoto atwal mom dok odwogo baŋgi.

⁵“Ŋa omio kane me tim loye kengi? Ŋa a miogi twer me rimo piny kite a yigi mito?

⁶An atyeko miyogi tim otwo me bedo acalo pacogi, kede lobo obedo kadokado me bedogi.

⁷Gin gigi mom owinyo woo moro a tye i boma, ŋattoro ame burugi me tiyo tic daŋ pe.

⁸Wi kiddi malo tye acalo bar me camgi, kan ame gin oyenyo iye ginnoro keken ame oromo camo.

⁹“Jobi twero ye tic piri? Itamo ni twero buto dyewor luŋ iyi awiini?

¹⁰Itwero tweyo i tol kweri dyen ite miyo pur, onyo romo loko poto a tye i luŋ kun lubo kede yori?

¹¹Ibino keto genni i kome pi teko mere adwoŋ wok-ki, onyo ibino miyo en tio tici luŋ?

¹²Igeno ni en bino dwogo, dok en bino kelo kal i laro?

¹³Bwom udo lelea, i twon awaka adwoŋ meicel, cite lacgi mom rom kede me ocecu ame akica-ni.

¹⁴Pien udo weko toŋe i lobo, eka lyeto a lobo en ate bedo obo komgi,

¹⁵En mom dok po ni dano twero nyono oko i tyengi, onyo ni lee tim daŋ twero nyono.

¹⁶Bedo ager agera baŋ itino mere calo mom mege, en mom bedo kede lworo moro ni ticcere romo kec nono,

¹⁷Pien Obaŋa twone ryeko oko, dok daŋ mom odute mottoro me niaŋ atut.

¹⁸Ka en oya me ŋwec, en nyero aguragura kede ŋat a riŋo kede.

¹⁹“Twer ame aguragura tye kede-ni yin imie bo? Yer aboco wok i ŋute yin imie bo?

²⁰Yin en imiogi otwarre calo bonyo? Gin oredo redo moro ame winyo lik,

²¹Ojebo wot i luŋ i tekkom kun owakere awaka, omwomere gigi amwoma me wot i lweny.

²²Kop i kom lworo gin onyero anyera, kun cunygi mom poto, mom tye pala lwennyoro ame miogi oloko ŋegi me dok ceŋ.

²³Jami lweny a jo a ŋwec kedgi owoto kede yeŋere ame awo awoa, ame toŋŋigi awil awila calo mac.

²⁴Omukere i ŋwec anyim i twon akemo meicel, mom oromo cuŋ mot ka okuto apel.

²⁵Ka owinyo koko apel, gin oredo ni, ‘Ee do!’ Gin oŋweo lweny i kannabor meicel, owinyo-gu mor kede redo odoŋe mony i teŋe.

²⁶“Ryekoni en omio olwit twarre malo bo, eka te yaro bwome kemo tutuŋ anyarolum?

²⁷Yin en iciko cur bo, ni twarre malo, eka te gero ode i wi kiddi malo?

²⁸En bedo dok i wi kidi malo, dok buto daŋ kuno, wi kidi oculle acula ni en doko ka pono mere,

²⁹En doŋ te bedo ŋoloro piny i kuno me yenyo gi-acama mere, waŋe bit meicel me neno jami i kannabor,

³⁰Itino mere doto remo, en mom rwenyo i kan a gin oto tye iye.”