Read lango Yubu 4 Bible Online

Yubu 4 - lango bible

Yubu 4

¹Erifaji dano me Teman te kobbi Yubu ni,

²“Ka ce adio cunya me kop kedi, cunyi bino waŋ? Ento ŋa ame twero liŋ nakanaka ame mom okobo kopporo?

³Nen ba, Yubu, yin yam ipwonyo jo apol meicel, imio ciŋ jo agoro onwoŋo teko.

⁴Koppi yam omio ŋat a kome a myel omedde cuŋ, dok imio jo ame coŋgi onwoŋo goro odoko atek odoco.

⁵Cite aman otuno i waŋeni mom doŋ iromo diyo cunyi, ogudi, omio cunyi doŋ oŋabere aŋaba.

⁶Lworo ame itye kede i kom Obaŋa, mom romo rwenyo par i cunyi? Ler a cunyi mom romo miyi ibedo kede gen?

⁷“Itwero po pi dano moro a mom i bal ame oto, ka ce ibolo waŋi i kare okato aŋec?” Onyo i kom jo moro a kitegi atira ame omio waŋgi orwenyo oko i akina jo turgi?

⁸Aco kite ame an aŋeo kede jo ame puro bal, te coyo koti me ayela nwoŋo daŋ can a rom, acalo gin ocek pi ticcere-nono.

⁹Yamo me weo Obaŋa en ame nekogi, awura me akemo mere en a tyekogi,

¹⁰Mor eŋatu, dwon eŋatu ager meicel, lak itino eŋatu otutura oko.

¹¹Twon eŋatu atek to oko ka leyi emak me amwoda mere pe, itino a min eŋatu ke keta oko atata.

¹²“Kop man okwila akwila, yita ogiporo i kare ame amuŋo amuŋa.

¹³Obino kun tye i akina tam, i lek me dyewor, i caa ame nino mit kede wok-ki.

¹⁴Twon lworo moro adwoŋ omaka, koma te ero myel oko, cogona luŋ te cako daŋ yeŋere oko.

¹⁵Tipo moro te wito beo i waŋa, yer koma te ya luŋ irii,

¹⁶Icennere te cuŋ doŋ mot, cite callere te loya oko. Onwoŋo kono atye aneno cal ginnoro, kun piny oliŋ iti, icennere ate winyo dwon ame kobo ni,

¹⁷‘Dano a to oko-ni twero bedo ame kite atira i nyim Obaŋa i yore aŋo? Dano twero bedo cil i nyim Ŋat Okete?’

¹⁸Aco kono mom geno omiro mere ikome, omalaika mere-gu en nwoŋo bal i komgi.

¹⁹Kara doŋ jo ame komgi obedo lobo ata-ni kono, ame acakki tergi tye i kwoyo, ame jwero yot kato jwero nyenye oko-ni?

²⁰Cakere odiko tuno naka otyeno nwoŋo doŋ otyekogi oko, orwenyo atwal ame ŋattoro mom dok paro pirgi.

²¹Dano gire calo kema ka oputo teke mere, to oko aboŋo ryeko moro.”