Read lango Yubu 40 Bible Online

Yubu 40 - lango bible

Yubu 40

¹Rwot te dok penyo Yubu ni,

²“Arot bal a jo twero pyem Won Twer Ducu? En ŋat ame pyem Obaŋa-nono koŋ doŋ gam doge do!”

³Yubu te gamo dog Rwot ni,

⁴“Nen ba, an kom mom a ginnoro i nyimi, kara abino gamo koppi niŋo ba? Mom atwero ŋamo doga me kop kedi.

⁵Akobo doŋ icel-li keken mom dok gira abino kop, mom dok aromo medde kadi acel.” Lee aryo adoŋo onyuto teko Obaŋa

⁶Rwot dok te gamo kop a Yubu yamo ajuru ni,

⁷“Twe pyeri i del ikiŋ calo amony, yikere me gamo penya ame apenyi kede.

⁸Itye ka nyuto ni an atimo bal? Imito ŋolo kop loya, me inyut ni koppi yin tye kakare?

⁹Yin daŋ badi cal kede me Obaŋa bo? Yin daŋ dwoni twero mor calo mege?

¹⁰“Ka amannono, koŋ doŋ irukere i kwogoni kede ditti, me twerri kede woroni nen.

¹¹Wuk doŋ akemoni agwa oko i kom jo, nen jo luŋ owaka, me imi wakeregi gik oko.

¹²Nen ŋat acel acel a wakere, me idie idwoke piny, dok inyon jo areco oko piny kan a gin ocuŋ iye.

¹³Yikgi luŋ piny i kwoyo, wum waŋgi oko piny i lyel.

¹⁴Mannono bino miyo an aniaŋ ate cako paki, ate ye ni yin iromo loyo lweny piri keni.

¹⁵Koŋ inen emir ame aketo calo yin, en camo lum calo twon.

¹⁶Nen koŋ kite ame pyere tek kede, kede kite ame ler yie nwaŋ kede.

¹⁷Yibe ocuŋ malo calo yat cedar, ler amuru mere okubere karacel.

¹⁸Cogo mere tek calo nyonyo me mola a yie twolo, tyene te rom aroma arii me mola.

¹⁹“En obedo tic Obaŋa me agege, ŋat ame ocwee en a myero ŋol kop i kome.

²⁰Okelo cam baŋe i wi kidi malo, kan ame leyi me tim tuko iye.

²¹En buto piny i te okutti ame tye i dog kulo, en pono i te ogada ame tye i coto.

²²Pien tipo okutti kede tipo ŋet i dog kulo, tipogi-nono wumo kome.

²³Nen ba, kadi bed pii i kulo amol atek ame atagere ataga, en mom lworo, en bedo a cunye opye kadi pii i kulo Jordan Opoŋ naka i nyime.

²⁴Tye ŋattoro ame romo make i golo, onyo ame twero tuco wume atuca owiccere moro te make?”