Read lango Yubu 41 Bible Online

Yubu 41 - lango bible

Yubu 41

¹“Itwero waya twon nyaŋ me pii a ŋeo panere wok-ki, onyo iromo tweyo lebe kede tol?

²Itwero rwako tol i wume, onyo tuco itinyo mere kede golo?

³Itamo ni en bino kwayi atek meicel? En romo kwayo kede mwolo?

⁴En bino cikere kedi, me wek yin itere, ewot ebed opiini atwal?

⁵Ibino tuko kede kite ame ituko kede i winyo? Onyo ibino tweye oko i tol me en bed yomoro cuny anyirani?

⁶Eryoŋet ocik rec bino laro wel me wilo? Gin bino poke oko i akina ocat wil?

⁷Ibino cocobo pyennere kede golli abittege, onyo ibino cobo wie kede biti me cik.

⁸Koŋ igud kome icelloro me inen, mom dok ibino nwoyo, dok wi mom bino wil i kom lwenyere kedi.

⁹“Nen ba, ŋat ame tamo ni eromo timo ginnoro nwoŋo obwolle gire kene, ka oneno waŋe keken bino nyobere oko.

¹⁰Mom tye ŋattoro a dok ger calo en, ame romo diyo cunye me tugge i kakare. Ŋa kara ame romo cuŋ i nyime?

¹¹Ŋa ame twero cako lweny kede eka te bwot? Mom gire tye ŋattoro i wi podo luŋ.

¹²“Wek koŋ akobbi kop i kom tyen twon nyaŋ a ŋeo pannere wok-ca, kede twon teko adwoŋ ame en tye kede, kede kite ame Obaŋa ocweo kede kome.

¹³Ŋa a romo woto rukkere i kome? Onyo ame romo tuco koti mola mere?

¹⁴Ŋa a twero miyo en ŋamo doge? Lake oromo yi doge luŋ ame neŋo lik.

¹⁵Ŋee oryeo iye kwode yore i yore, gin luŋ okubere karacel kun otek calo gwen.

¹⁶Acel acel i akinagi ceggi acega awottere, ame yamo mom romo kato i akinagi.

¹⁷Gin luŋ ononota oko, ŋat man awottere, omakere ame poko i akinagi mom twerre.

¹⁸Ka ogweo, lao doge ryeny aryenya calo ceŋ, waŋe obok pee calo ceŋ ka pwod adonnyo adonya odiko.

¹⁹Leb mac meny kato i doge calo mac rao, kun kir i doge calo mac otyer.

²⁰Yito duny donyo i wume, calo yito adonyo i gulu.

²¹Ewura me weo mere twero kuto mac i milo, kun leb mac a lyel kato i doge.

²²Ŋute tek meicel, ame ŋat orwatte kede lworo ciro oko.

²³Riŋo kome ocikere acika karacel, ocikere atek ikiŋ ame mom romo dwinyere.

²⁴Cunye tek calo kidi, tek meicel calo nyonyo.

²⁵Ka ce en otwarre malo, twoni jo atek doko alwor, lworo miogi onyobere odoco.

²⁶Kadi cob kome i pala lweny, mom donyo kadi acel, kadi cob kome i toŋ, onyo atero onyo toŋ abit meicel.

²⁷Bano nyonyo calo ren kal, aco mola te calo yat otop.

²⁸Atero mom romo miyo en mukere i ŋwec, atiŋdio i baŋe calo lum otwo.

²⁹Abiro en neno calo ogada, ka jo omio toŋe abit ocobo kome en nyero anyera.

³⁰Piny yie bit calo tako abit, ka awot tuco coto adyaka atuca.

³¹En mio pii i kut yenyo calo pii ame awalo i keno; mio pii i nam yenyo bwoo atar kia calo bwo moo ame ayenyo iyi gulu.

³²Ka atagere i wot yore nen atar kia miyo kut buko atar kia calo lwar i wic.

³³Mom tye ŋattoro ame rom kede i wi lobo-ni luŋ, en keken obedo gin ame mom tye kede lworo moro.

³⁴Jami luŋ tye piny i tere, en abaka ame loo kit ginnoro luŋ a wakere.”