Read lango Yubu 42 Bible Online

Yubu 42 - lango bible

Yubu 42

¹Yubu te gamo dog Rwot ni,

²“An aŋeo ni yin iromo tiyo ginnoro luŋ; gin ame yin iyiko ni iti cobere.

³Yin ikobo ni, ‘Man kara ŋa ame mito ni ewum tamma nie, kun kono en mom ŋeo ginnoro kadi acel?’ An gire rik akobo gin ame mom aniaŋ iye, akobo kop i kom gigi mogo me awura meicel, ame an mom aŋeo.

⁴Rik akobbi ni, ‘Winy koppa, me akobi; yikere me gamo penya ame apenyi kede.’

⁵Rik awinyo piri awinya, cite aman doŋ aneni kede waŋa:

⁶omio doŋ acaye kena meicel, ate ŋut kun abukkere apua kede buru.”

⁷Kare ame Rwot doŋ otyeko kobo kop magi luŋ baŋ Yubu, Rwot te kobbi Erifazi dano me Teman ni, “Akemo omaka meicel i komi kede i kom owoteni aryo-nu, pien mom ikobo wunu kop me ateni i koma kite ame amirona Yubu obedo kobo kede.

⁸Aman doŋ ba, myero ikwany wunu twoni abiro kede nyogi rommi abiro, iwot wunu kede baŋ amirona Yubu, me iwot iyala wunu i mot awaŋa pirwu; amirona Yubu bino kwaya pirwu; pien abino winyo kwaccere, mom abino keto lewic i komwu ame rom i kop ame ibedo kobo wunu i koma, Pien wun mom ibedo kobo wunu kop ame tye kakare i koma kite ame amirona Yubu obedo kobo kede.”

⁹Mannono omio Erifaji dano me Teman, kede Bildad dano me Cua, kede Jopar dano me Naamat te wot timo gin ame Rwot okobbigi; Rwot daŋ te gamo kwac a Yubu.

¹⁰Rwot odwoko gum a Yubu i kare ame en otyeko kwayo Rwot pi owote mere; Rwot omio Yubu jami abup ame doko maca me agege ca tyen aryo.

¹¹Jo luŋ a rik onwoŋo ŋec con, kede omego mere, amego mere te bino baŋe, gin luŋ ote bino cam karacel kede i ode. Gin luŋ ote nyuto baŋ Yubu cuny me kica i kome, kun daŋ okweo-cunye pi gin arac ame Rwot onwoŋo omio otimere i kome. Ŋat acel acel i akinagi te miye dul lim ame onwoŋo tye i ciŋe kede atem me jabu.

¹²Rwot te miyo gum baŋ Yubu i kare man icennere-ni ame kato me agege oko; en onwoŋo tye kede rommi ame romo tutumia apar wie aŋwen, inaga tutumia abicel, twoni pur tutumia acel, megi kane tutumia acel.

¹³Awobe mere onwoŋo tye abiro kede anyira daŋ dok adek.

¹⁴Nyiŋ nyako me agege Yemima; me aryo Kejia; me adek Keren-kappuk;

¹⁵i kom anyira luŋ ame rik onwoŋo tye i lobo i kare-naca, mom tye moro ame onwoŋo ber akato anyira a Yubu; papagi rik te miyogi lobo me alea acalo megi i akina omegogi.

¹⁶I ŋe mannono Yubu dok te medde perakino i lobo pi mwakki ame romo mia acel kede pyeraŋwen, ame te neno ikwae tuno kede naka i me aŋwennere.

¹⁷Yubu te to ame doŋ oteggo atek, dok mwaka mere bup meicel.