Read lango Yubu 5 Bible Online

Yubu 5 - lango bible

Yubu 5

¹“Koŋ doŋ ilwoŋ ba, tye ŋattoro ame twero gamo dogi? Kara tin ilokere baŋ ŋa ba, i akina jo acil?

²Ateteni, akemo mio amiŋo to oko, nyeko neko ŋat a mom i ŋeccoro.

³Waŋa otyeko neno amiŋo ame ocuŋ atek, cite aceno kan a en bedo iye oyot meicel.

⁴Yo moro me bwot mom tye pi itino mere, itino mere oneko oko i dogcel, ame ŋattoro a konyogi mom tye.

⁵Cem ame en okao jo a kec neko camo ata, gin okwanyo oko akadi tye i akina okuto, jo ame mitgi dwon okato kare laro lonyo mere.

⁶Pien can gire mom ya i piny iyi apua, ayela daŋ mom tu i lobo;

⁷ento dano gire onywalo pi ayela kite ame mac kir kede malo.

⁸“Aco kono an gira, kono ayenyo kony i baŋ Rwot, kono atero pekona baŋ Obaŋa,

⁹ame tio gigi mogo adoŋodoŋo ame tato tere tek, gigi mogo me awura ame pol ata.

¹⁰En mio kot cwe i lobo, cwalo pii i potti.

¹¹Jo a piny en keto i kabedo i malo, tiŋo jo akumo bedo i kabedo aber.

¹²Tamoryeko me goba en balo oko, cobo ticgi te loyogi oko.

¹³En mio oryeko moko iyi owic me ryekogi en mio yik a jo a tamgi ogom balle oyotoyot.

¹⁴Piny odoko colligi kun ceŋ pwod tye, owoto ityamtyam i cuny dyeceŋ bala dyewor.

¹⁵Cite en laro itino kic oko i doggi, laro daŋ jo a piny oloo i ciŋ jo atek.

¹⁶Mannono omio ocan tye kede gen, otim jo cucu mio doggi oko.

¹⁷“Ŋat ame Rwot juko tye kede winyo, pi mannono, kur ica pwony a Won Twer Ducu ba,

¹⁸Pien en ka owani tweo waŋ kan cwano oko, en twero goyi cite daŋ caŋi oko.

¹⁹En bino lari i kom ayela apapat abicel, ginnoro arac mom doŋ twero gudo komi kadi i tyen me abiro mere.

²⁰I kare me kec en bino larri oko, mom ito, i lweny en lari i teko a leb pala lweny,

²¹En bino gwoki i lyeto a kop ame ya i dog jo, bino miyo mom ilworo ka obino i komi.

²²I kare me to kede me kec, yin ibino nyero giri anyera, mom daŋ ibino lworo lee moro ame tye i wi lobo.

²³Pien yin ibino cikere i gweŋe ame tye i tim, leyi me tim daŋ bino bedo kedi i kuc.

²⁴Ibino ŋeyo ni kemani tye aber, ibino roto awiini, ginnoro mom bino rwenyo iye.

²⁵Ibino daŋ ŋeyo ni ikwai bino bedo apol, kun itino ame oya i komi pol calo lum i tim.

²⁶Ibino to ame doŋ iteggo, kun komi pwod tek, calo bel ame otero wot dino i laro ka kare mere oromo.

²⁷Nen ba, kop man wan otyeko yenyo tere, onwoŋo ni tye gire ateni. Winy ite mako daŋ me konyi.”