Read lango Yubu 7 Bible Online

Yubu 7 - lango bible

Yubu 7

¹“Kwo a dano i lobo rom i kare ame dano obedo kede i mony, kare me kwo mere rom aroma i kwo apakaca,

²Rom aroma opii ame mito bedo i tipo, rom aroma apakaca ame cunye bedo i kom ocara mere.

³Amannono doŋ, an otyeko miya dwete apol me bedo abeda, dyewor me kanyorem daŋ doŋ omoko oko pira.

⁴Ka abuto piny aparo pi kare ame abino ya iye, cite piny mom mito ru, abedo pwodde apwoda naka piny iter.

⁵Kudi kede cila onwoŋo omwone amwona i koma, del koma two te cako belle i tut.

⁶Nino acel acel dwir kato yat cweyo boŋo oko, nino acel acel kato weka i canna.

⁷“Po ru kwona rom aroma kede yamo, mom dok abino nwoŋo yomcunnyoro kadi acel.

⁸Ŋat ame onena mom dok bino nena, ibino ciko waŋi me nena cite mom ibino nwoŋa.

⁹Kite ame pol ket kede, mom te nen, amannono daŋ, ŋat ame donyo piny i lyel mom dok dwogo oko i lobo.

¹⁰Mom dok dwogo tuŋe kadi acel, ode daŋ mom dok romo ŋeye.

¹¹“Pi mannono ba, mom abino liŋ, abino kop pien rem ocira oko, myero akobbi pien atye kede akemo.

¹²An abedo nam bo, onyo twon nyaŋ adwoŋ me kulo, omio yin imito ni ber kura akura?

¹³Ka akobo ni, ‘Kabutona bino kweyo cunya,’ onyo ni, ‘Rem koma bino kwe oko ka abuto piny,’

¹⁴ento yin ibedo ryaryaŋo koma i lek atata, imio lworo bedo maka pi anyuttogo ame abedo neno dyewor,

¹⁵mannono omio amito ru kono odea adea, tika doŋ ato, kato bedo i rem kit man,

¹⁶Mom amito abed bedo kit man, mom amito ni abed kwo nakanaka, Weka gira abedi, pien kare me kwona calo yamo.

¹⁷Dano kara gin aŋo, omio pire litti wokkono, dok omio yin ibedo keto cunyi i kome.

¹⁸Piŋo kara ibedo lime kare luŋ, kun daŋ ibedo teme teretere.

¹⁹Ibino bedo nena kittono naka awene, kun mom iloko waŋi teŋe? Wekka koŋ kare moro me mwonyo lao ba.

²⁰Ka ce abolo, nwoŋo atimo kara ŋo i komi, yin agwok jo? Piŋo kara ibedo bayo toŋŋi i koma kare ducu? Piŋo kara adoko twon yeccoro apek meicel baŋi?

²¹Piŋo kara mom itwero tima kica i kom balla? Piŋo mom ijwao balla oko? Pien aman doŋ abino buto piny lobo, ibino yenya cite ibino nwoŋo mom doŋ atye.”