Read lango Yubu 8 Bible Online

Yubu 8 - lango bible

Yubu 8

¹Bildad dano me Cua te cako gamo kop a Yubu kun kobo ni,

²“Kara ibino bedo kobo kop man naka awene ba, kun koppi calo twon yamo moro akodo atek meicel?

³Obaŋa mom ŋolo kop atira bo? Onyo Won Twer Ducu mom timo gin atye kakare?

⁴Ka ce itinoni obedo timo balloro baŋe, en doŋ otyeko miyogi ite loc a balgi-nono.

⁵Ka ce ibino woro Rwot, kun icwao kwacci baŋ Won Twer Ducu;

⁶ka ce yi cil, dok cunyi daŋ atira, en gire bino ya malo me konyi, en bino culli, bino miyo kabedo aber piri.

⁷Kadi bed rik con i kare ame icako, kwo acaka rik jamini nok, itwero pwod bedo i jami adwoŋ meicel i agikki me kwoni.

⁸“Tim ber koŋ ipeny kwariwa, me koŋ itam gin ame obedo timere i kom kwariwa,

⁹pien wan pwod otoco, mom oŋeo ginnoro, dok kare me kwowa i lobo man lokere calo tipo.

¹⁰Gin mom obino pwonyi ote kobbi koppogo, pien gin otye kede niaŋ atut meicel.

¹¹“Aladu doŋo kan ame coto mom iye? Ogada doŋo aber kan ame pii mom iye?

¹²Gin two oyot meicel akato ginapita ocele ka pii pe, akadi pwod odoŋo adoŋa, kun daŋ mom otoŋo tergi.

¹³Mannono en gin ame timere i kom jo ame mom paro pi Obaŋa, gen ame ŋat a kwia Obaŋa tye kede ke nono.

¹⁴Gennere cot oko calo uci, gennere rom aroma kede boo otyatyam.

¹⁵Ka ojeŋere i kom ode mom romo cuŋ, ka ocwao ciŋe omako, mom daŋ romo cuŋ atek.

¹⁶Calo ginapita ame doŋo i kare ame ceŋ lyet, ame potgi lot wumo poto oko.

¹⁷Lwitgi dwalle i kom gweŋe, gin bedo i akina gweŋe.

¹⁸Ka oputogi oko i kakargi, kabedogi-nono kwerogi oko, kun okobo ni, ‘An yam mom ru anenowu.’

¹⁹Mannono en gin ame timere i kom jo a mom paro pi Obaŋa, ka gin oya i lobo, jo ocele leo kakargi oko.

²⁰“Nen ba, Obaŋa gire mom kwero ŋat a mom i balloro dok daŋ mom konyo jo areco.

²¹En gire pwod bino miyo inyero, ibino daŋ redo gire i yomcuny.

²²Lewic bino ciro jo ame dagi oko, kema a jo areco bino rwenyo oko.”