Read lango Yubu 9 Bible Online

Yubu 9 - lango bible

Yubu 9

¹Yubu te gamo kop a Bildad ni,

²“Aŋeo ni kop ame ikobo tye kakare, cite dano twero loyo kop i nyim Obaŋa i yore aŋo?

³Ka ce ŋattoro mito pyem kede, Obaŋa twero penyo peny tutumia acel twal, nwoŋo dano mom ru odok i moro acel iye.

⁴Obaŋa ryek meicel i cunye, dok teko mere daŋ dwoŋ meicel. Ŋa a yam koŋ oero lweny kede te loye?

⁵En kobo kidi oko i kakargi kun gin mom oŋeo, kare ame en tye alolokogi akemo.

⁶En mio lobo yeŋere, eka te ya oko i kakare, en yeŋo anaka acakki te lobo luŋ.

⁷En ka ociko ceŋ, ceŋ mom donnyo, en twero wumo waŋ acer oko dyewor mom te ryeny.

⁸En opeto polo gire kene, te wot i wi pii nam atwagere.

⁹En otio gin ame olwoŋo Ajaraŋuu kede lwak acer abiro ocokere karacel, kede acer ocele ame olwoŋo ni Lyer-nino kede en ocele mere ame bedo i tuŋ anyarolum.

¹⁰En tio gigi mogo adoŋodoŋo ame tato tere tek, gigi mogo me awura ame pol atata.

¹¹Koŋ inen, en ka obeo i ŋeta, mom aromo neno, woto naka kato kun mom aŋeo.

¹²En twero kwanyo ginnoro keken a yie mito aboŋo ŋattoro ame geŋe, mom tye ŋattoro ame romo penye ni, ‘Itimo ŋonnono?’

¹³“Obaŋa gire mom juko akemo mere, jo ame rik konyo Rakab ryebere piny i nyime wore.

¹⁴Kara doŋ an aromo gamo koppere i yore aŋo, kun ayero kop ame myero apid kede i nyime?

¹⁵Kadi balla moro mom, mom gira aromo gamo doge, an myero ka akwa aŋolkop tima kica.

¹⁶Ka ce rik ogamo doga i kare ame alwoŋe, kono mom aye ni en onwoŋo obedo winyo koppa.

¹⁷Pien en obukoro i koma meicel calo yamo, bedo-gu medo bur i koma ameda aboŋo tyen kopporo.

¹⁸Mom weka kare moro me weo, kun mio cunya bedo waŋ awaŋa.

¹⁹Ka lweny me nyuto teko, myero inen gire Obaŋa! Ka ce akobo ni apide, ŋa kara ame twero lwoŋe?

²⁰Kadi balla moro mom, kop ame ya i doga romo miyo kop loa, kadi bed an anen ni a mom i balloro, en nyuto oko ni an gire agak.

²¹An gira balla moro mom, mannono omio mom aparo, mom amito ni kono amedde bedo kwo.

²²Ducu rom aroma, mannono omio an akobo ni, ‘Obaŋa jwero luŋ, jo a mom i bal kede jo obalo!’

²³Ka ce can opoto ame te kelo to atura, i kom ŋat a mom i bal, en nyero can ame opoto i komenono anyera.

²⁴Obaŋa omio lobo iciŋ otim tim areco, en wumo waŋ oŋolkop oko, ka ce mom en, kara ŋa a doŋ wumo?

²⁵“Kare me kwona doŋ dwir kato anwec oko; otwarre doŋ atwara, kun mom oneno ginnoro aber.

²⁶Kare me kwona doŋ acunyo ŋwec acunya calo cur a lyao piny me yuto gi-acama mere.

²⁷Ka akobo ni, ‘Wia gire bino wil oko i kom pekona, cunya te bedo ayom ame abwonyo kare luŋ.

²⁸Pwod dok abedo kede lworo pi twon rem ame abeo iye, pien atamo ni mom ibino tera acalo ŋat a mom i balloro.’

²⁹Nen, ibino ŋolo kop loa, kara dok abedo lolle i tic piŋo?

³⁰Mom doŋ konyo ginnoro kadi acel kadi bed alwokere kede pee, kun alwoko ciŋa-gu i cabun agwa meicel,

³¹pwod gire ibino bola i bur, boŋŋina i koma te kwera oko.

³²“Obaŋa gire mom obedo dano calo an, ame mio an agamo doge, kono obedo dano kono opido kede oko.

³³Mom tye ŋattoro ame twero ŋolo kop i akinawa ame romo keto ciŋe i komwa wan aryo luŋ,

³⁴Mom tye ŋattoro ame romo geŋe keto can i koma, ame twero geŋo twon lworo adwoŋ ame atye kede i kome,

³⁵ame mio akobo kop aboŋo lworo, an mom anenne kena kittono kadi acel.”