Read lango Jabuli 10 Bible Online

Jabuli 10 - lango bible

Jabuli 10

¹Piŋo kara icuŋ kannabor abora, Ama Rwot? Piŋo kara ibedo pono apona i kare me ayela?

²Otim tim areco tye ka diyo ocan kun owakere meicel, migi omok kengi i gin ame gin oyiko.

³Dano arac wakere pi tam arac ame tye i cunye, dano owor inwoŋo lim yeto Rwot kun daŋ cao acaa.

⁴Dano arac mom paro pi woro Obaŋa, en wakere i cunye kun kobo ni, “Obaŋa gire mom.”

⁵Yo ame en lubo ocuŋ atira i kare luŋ, en mom paro pi ŋolo koppi, pien bor kede abora, en yeyea ni etek i nyim okworrere luŋ.

⁶En bedo tamo i cunye ni, “Ginnoro gire mom bino corra teŋe; cannoro daŋ gire mom bino poto i koma pi kare me kwona luŋ.”

⁷Kop i doge opoŋ i ceno jo, bwolo jo kede wuno jo, en kobo kop arac kede bal.

⁸En bedo libo jo i akina pacci, neko jo a mom i balloro ka pono mere.

⁹En ciko waŋe i kom jo ame can orido, pono imuŋ, kun kio jo calo eŋatu, En pono oko me wek emak ocan, en mako ocan ka ce omio odonyo iyi boo mere.

¹⁰Jejebo jo ame can orido, te diyogi oko piny, pien teko okworgi onwoŋo loo meggi oko,

¹¹En bedo tamo i cunye ni, “Wi Obaŋa gire owil oko, en omio waŋe oko, mom gire romo nena.”

¹²Ya malo, Ama Rwot, rye ciŋi malo, Ama Obaŋa; wii kur wil i kom jo ame tye kede can,

¹³Piŋo atim tim arac cao Obaŋa, kun kobo i cunye ni, “Yin gire mom ibino pwoda?”

¹⁴Yin giri ineno, dok iŋeo can kede cwercuny ame dano tye kede, i kare luŋ iyikere me miyo kony. Dano a mom romo konyere kene, miye i ciŋi pien yin giri en ikonyo itino kic.

¹⁵Tim ber itur bad jo areco, kede otim tim areco, yeny balgi luŋ, tuno ka mom doŋ inwoŋo moro,

¹⁶Rwot en abaka ame perakino waŋ i waŋ, rok luŋ bino to oko i lobo mere.

¹⁷Ama Rwot, yin gire ibino winyo kwac a jo ame mwol, yin ibino miyo cunygi bedo atek, ibino ciko yiti i kwacgi.

¹⁸Ibino ŋolo kop atira pi itino kic kede jo ame owuno, me wek jo me lobo man mom dok okel lworo.