Read lango Jabuli 102 Bible Online

Jabuli 102 - lango bible

Jabuli 102

¹Man kwac a ŋat ame can opoto i kome, ame en keto i nyim Rwot, i kare ame can omio cunye ogem agema. Winy ba kwacca, Ama Rwot; ye kokona owinyere baŋi!

²Kur iponna oko ba, Ama Rwot, i kare ame can orida meicel, cik yiti iwiny koppa; ru gamo doga oyotoyot i kare ame akok baŋi!

³Kare me kwona kato oyotoyot calo yito, cogona luŋ rem arema calo waŋ mac.

⁴Kedi olidolido cunya meicel calo lum ame otwo, omio wia doŋ wil oko cam ame myero acam,

⁵Pien curra doŋ winyere malo amala; riŋo koma doŋ otwo imek i kom cogona.

⁶Acalli doŋ acut ame bedo itim, acalo tula ame bedo i wii obur;

⁷abuto ame waŋa okwekere akweka, acalo winyo ame bedo kene i wi ot malo.

⁸Okworra doŋ bedo kobo kop areco i koma ceŋ iyul, jo ame nywara doŋ tio i nyiŋa me ceno jo ocele.

⁹Nen doŋ buru en ame tye acalo cem ame acamo, pig waŋa doŋ rubere i ginnoro luŋ ame amato,

¹⁰Mannono timere pi lyeto me akemoni kede inigani, pien yin ikwanya ite bolla oko.

¹¹Kwona doŋ calo tipo me otyeno; atwo doŋ calo lum.

¹²Ento yin ibedo i wi kom me loc nakanaka, Ama Rwot, lwagi jo me kare ducu poyo yin.

¹³Ibino ya kica te maki i kom Cion, kare doŋ oromo oko me nyuto beri baŋe; kare ame rik iciko pire doŋ otuno oko.

¹⁴Omironi ducu mare, kadi bed gedo iye doŋ obalo oko, kica makogi meicel i kome kadi bed doŋ calo apua.

¹⁵Rok ducu bino lworo Rwot, obakki luŋ ame tye i lobo bino lwore pi kwogo mere.

¹⁶Pien en Rwot bino gero Cion dok odoco, en bino nen kun nyuto kwogo mere.

¹⁷En bino winyo kwac a jo ame piny oloo, mom bino cayo kwac me bako dog ame okelo i nyime.

¹⁸Kop man myero co piny pi lwagi jo ame tye ayim, me wek jo ame mom ru onywalogi, wek gin obin opak Rwot,

¹⁹kun okobo ni, Rwot neno piny i kabedo mere acil ame tye malo, en neno wi lobo luŋ i polo kuno,

²⁰me winyo cur a jo ame tye i ot kol, dok egony jo ame doŋ otyeko ŋolligi kop me to.

²¹Mannono twero miyo jo rabo nyiŋ Rwot i Cion, dok opak nyiŋe i Jerucalem,

²²i kare ame lwak ocokere karacel, naka oloc apapat me woro Rwot.

²³En oturo tekona oko con ame pwod atidi; ojwiko kare me kwona oko.

²⁴An ate kobo ni, “Ama Obaŋana, kur ikwany kwona oko ame mom ru ati; yin ame kwoni perakino nakanaka.”

²⁵Yin en ame yam iketo acakki te lobo con meicel, polo daŋ en tic me ciŋi,

²⁶Gin bino rwenyo odoco, ento yin ibino perakino; gin luŋ bino ti calo boŋo, yin ibino lolokogi calo koti, gin te rwenyo oko atwal;

²⁷ento yin ibedo ame kiti acel, mwakani mom bino gik,

²⁸Ibino miyo itinowa, wan omironi bedo ikuc aboŋo peko moro; dok yin en ame ibino gwoko ikwaegi imio perakino i nyimi.