Read lango Jabuli 103 Bible Online

Jabuli 103 - lango bible

Jabuli 103

¹Man wer ame Daudi owero. Pwo Rwot, yin tipona, dul koma luŋ myero pak nyiŋ Rwot acil.

²Pwo Rwot, yin tipona; wi myero kur wil i kom mottoro luŋ abeco ame en omi,

³en gire en ame gonya i balle luŋ, dok daŋ en ame caŋo twona luŋ;

⁴en ame laro kwona i bur me to, en ame ruka kede mar a mom lokere kede kica;

⁵en mia jami abedo pi kare me kwona luŋ, dok daŋ roco kwona kare i kare calo cur.

⁶Rwot ŋolo kop kakare dok daŋ arorom, en ŋolo kop a jo ame owuno atira,

⁷En rik onyuto yikkkere luŋ baŋ Muca, omio jo Icrael oneno ticcogo me awura ame en otio.

⁸Rwot akica, dok timo jo ber, akemo mom mako oyot, dok marrere a mom lokere dwoŋ meicel.

⁹Akemo mom maka atwal, Iniga mere mom ri nakanaka,

¹⁰en mom timowa kun poro i kit bal ame wan otimo, dok daŋ mom culo kwor i komwa kun lubo kit bal ame wan otimo.

¹¹Pien kite ame polo tye kede malo ame bor abora i lobo, marrere a mom lokere daŋ dwoŋ kittono i kom jo ame lwore.

¹²Kite acalo tuŋ kide bor abora i tuŋ to, amannono daŋ en kwanyo bal i komwa te cwalo oko kannabor.

¹³Acalo papal i tino bedo i kica i kom itinogi, amannono daŋ, kica mako Rwot i kom jo ame lwore.

¹⁴Pien ŋeo kakannoro luŋ i dul komwa; en ŋeo aber ni wan obedo apua keken.

¹⁵Aco kwo a dano mom perakino kare alac, rom aroma i me ature ame lot eka dok te oony oko.

¹⁶Ka yamo okodo rwenyo oko ducu, kabedo ame onwoŋo en bedo iye-nono mom doŋ te po pire kadi acel.

¹⁷Ento mar a mom lokere ame Obaŋa tye kede i kom jo ame lwore, perakino wan i waŋ, karacel kede kiti atira baŋ lwak jo me kare ducu.

¹⁸Baŋ jo ame gwoko cikere mere ame po me timo gin ame en ociko,

¹⁹Rwot ocibo kom me loccere i polo, en loo wi podo luŋ.

²⁰Wun omalaika a Rwot, pak wunu Rwot, wun twoni jo mere atek, tim wunu gin ame en okobo, kun iwinyo wunu kopporo luŋ ame en kobo baŋwu.

²¹Wun mony a Rwot luŋ ame tye i polo, pake wunu, karacel kede wun oticcere ame tio gin ame en mito.

²²Wun ginnoro luŋ ame Rwot oketo, pake wunu, i kabedo luŋ ame en loo, Pwo Rwot, yin tipona.