Read lango Jabuli 104 Bible Online

Jabuli 104 - lango bible

Jabuli 104

¹Pwo Rwot, yin tipona; Ama Rwot Obaŋana, yin idwoŋ meicel! Yin irukere i kwogo kede woro;

²lero owumo komi oko calo boŋo, iyaro polo kite ame tye kede-ni calo kema,

³Ŋa oyubo paconi malo iyi pii? Iloko polo odoko calo gadigadini, ame iŋweco kedgi i dye yamo,

⁴Iloko yamo odoko akwenani me aora, kun leb mac alyel tye acalo otic ame tye baŋi.

⁵Yin en a rik iketo lobo ocuŋ atek i kom acakki mere, ame mom twero yeŋere atwal.

⁶Iwumo oko i nam atut calo gin ame owumo i boŋo, kun pii daŋ ocuŋ iguŋ i wi kiddi malo.

⁷Ka ijukogi oriŋo oko; ka lutkotti omor, gin oŋweco oko.

⁸Omol i wi kiddi malo odok i luŋ piny, naka iyi akoŋ ame ityeko yiko pirgi.

⁹Iyiko pirgi waŋ apokki ame myero mom okati, me wek kur dok opoŋ lobo oko.

¹⁰Imio akoŋ doŋ kukunya dok iluŋ, kun omol i akina kiddi.

¹¹Ieyi me tim luŋ mato pii nono, kane me tim daŋ konyere iye ka oryo ocirogi.

¹²Lwak winnyi luŋ ame twarre malo gero wudigi iye, ote bedo woo i koko i jaŋ yenni kuno.

¹³Imio kot ya i polo cwe piny i wi kiddi, jami abeco ame yin itio te poŋ lobo.

¹⁴Yin en imio lum lot me acama a dok, karacel kede ginapita ocele me tic a dano, me dano kur loba te nwoŋo cam iye.

¹⁵Me dano nwoŋo koŋo olok te yomoro cunygi, kede moo wir ame mio waŋgi nen aber, kede dok en cam ame miogi teko.

¹⁶Yen a Rwot nwoŋo pii adwoŋ ame romogi, yen cedar me Lebanon ame en Rwot opito,

¹⁷Lwak winnyi apol gero udigi i wii yen kunnu, araptela daŋ bedo i wi yen aboco kuno.

¹⁸Dyegi me tim bedo i wi kidi malo kuno; elec nwoŋo ka larregi i akina kiddi.

¹⁹Yin en a rik iketo dwe me poko kare, ceŋ ŋeo caaa mere me poto,

²⁰Yin iketo colpiny ame imio bedo dyewor, mannonono en kare ame leyi i buŋ cako wotgi iye,

²¹Itino eŋatu dwaro leyi me amwoda i koko doggi, kun oyenyo camgi i baŋ Obaŋa.

²²I kare ame cen doŋ odonyo oko; gin luŋ odok oko ceŋ i kabedogi i gorogoro

²³Jo cako wot i ka ticgi, ote tic tuno naka otyeno,

²⁴Ama Rwot, yin itio tic ame kite polladi! itiogi luŋ kede ryeko meicel, omio jami ame yin iketo dwoŋ meicel i lobo.

²⁵Nen, nam adwoŋ tye ame okwako kabedo alac miecel jami ame yin iketo tye iye apol ame mom kwanne, gigi mogo akwo adoŋo mege karacel kede en atino tye iye kuno,

²⁶Mellogo adoŋo daŋ beo iye kuno, karacel kede Leviatan ame en twon twolloro adwoŋ me kulo, daŋ tuko iye kuno,

²⁷Jami magi luŋ oneno baŋi, gin luŋ omito ni migi cam i kare ame omitte ikokome.

²⁸Ka ce imiogi gin okwanyo ote camo oko, ka iyaro ciŋi imiogi cam, gin yeŋ icam abeco.

²⁹Ka ce yin iponnigi oko, gin waŋgi balle oko; ka ikwanyo weo me kwo oko i komgi, oto oko, ote dok i apua kun ame yam oya iye.

³⁰Ka ce yin icwalo i yigi cunnyi ame miogi kwo, gin okwo, dok daŋ imio loba odoko anyen

³¹Kwogo a Rwot myero gire pera kino nakanaka! Rwot myero bed i yomcuny pi gin ame en otio.

³²Rwot neno lobo, lobo te yeŋere, ka ogudo kiddi, yito cako duny iye.

³³Abino wero wer me pako Rwot pi kare me kwona luŋ, abino wero wer me pako Obaŋana pi kare ame pwod atye kwo,

³⁴Kop ame anyuto i cunya, myero yomoro cuny jo, pien an gira alelo pire yin Rwot.

³⁵Jo ame obalo myero tyek oko i lobo, me wek otim tim areco kur dok bed tye atwal. Pwo Rwot, yin tipona, pak wunu Rwot!