Read lango Jabuli 105 Bible Online

Jabuli 105 - lango bible

Jabuli 105

¹Pwo wunu Rwot, lwoŋ wunu nyiŋe, mi wunu tic ame otio ŋeye i akina rok ducu!

²Wer wunu wer me pake, wer wunu baŋe, tit wunu ticcoro luŋ me awura ame en otio!

³Ket wunu kwogo i kom nyiŋe acil; mi wunu cuny jo ame yenyo Rwot bed ayom!

⁴Yeny wunu Rwot karacel kede teko mere, bed wunu i nyime nakanaka.

⁵Poyo wunu pi ticcogo me awura ame en otio, taŋo mogo ame en otio, karacel kede ŋolo kop ame en oŋolo,

⁶Wun ikwae amiro mere Iburaim, wun itino a Yakobo ame en oyerowu.

⁷En obedo Rwot Obaŋawa; Kop ame en ŋolo, ŋolo i lobo ducu.

⁸En po i kom cikere mere nakanaka, i kom kop ame en ociko pi mwakki a lwagi jo me kare ducu,

⁹kom cikere ame en rik ocikere kede Iburaim, i kom kwoŋ ame rik en okwoŋo baŋ Icaka.

¹⁰Ame en te bino moko baŋ Yakobo doko acalo cik, baŋ Icrael me bed cikere ame perakino waŋ i waŋ.

¹¹Kun kobo ni, “An abino miyo lobo me Kanaan baŋwu, me bed lobowu ame ileo wunu me bedo megwu.”

¹²I kare ame welgi pwod nonok, ame gin tye acalo wele ame mom oparo pirgi,

¹³ame obedo loŋo piny aloŋa i akina rok apapat, ame oya i loc man okobo baŋ rok ocele.

¹⁴En mom oye ŋattoro me wunogi, en ojuko obakki pirgi,

¹⁵kun kobo ni, “Kur igud wunu omirona ame atyeko yero, kur itim wunu ginnoro aracl kom odwarpinnya.”

¹⁶I kare ame en omio kec opoto lobo, obalo camgi luŋ ame okwo kede.

¹⁷En onwoŋo ocwao dano con i nyimgi, ocwao Yucepu ame omio ocate acalo opii.

¹⁸Rik ote tweyo tyene oko i jegere atek, ote tweyo daŋ kol i ŋute;

¹⁹tuno waŋ ame gin ame onwoŋo en okobo ocobere kakare, kop a Rwot oteme onwoŋo ni en tye atir.

²⁰Abaka, ocwao kop ote gonye oko, oloc ame onwoŋo loo orok te doŋ wekke bedo kede kuc;

²¹en te miye bedo adwoŋ ame loo ode, ŋat ame loo jami luŋ ame tye i ode,

²²omie daŋ twer me pwonyo rwode ocele kite ame yie mito, kede me pwonyo odoŋe ame mie tam, i ryeko.

²³Omio Icrael owoto i Miciri, Yakobo te doko welo ame bedo i lobo a jo Kam.

²⁴Rwot te miyo lwakkere nywal nya apol meicel, te daŋ miyogi doko atek ame kato okworgi oko.

²⁵Oloko cuny jo Miciri, te miyogi cako dago jo mere oko, gin te cako timo tim me idwali i kom omiro mere.

²⁶Ocwao amiro mere Muca, karacel kede Aron ame en oyerogi.

²⁷En otio anyuttogo i akinagi karacel kede taŋo i lobo me Kam.

²⁸Ocwao colpiny te miyo lobo cido oko icuc, ento gin ote jem oko mom ote ye winyo koppere.

²⁹Oloko pii i kulo te doko remo, te miyo rec luŋ ame tye iye to oko.

³⁰Ogwalogwal apipim te corre i lobogi, naka i paco abakagi.

³¹Obaŋa okobo kop keken lwak lwaŋi apipim te corre i lobogi, karacel kede onyogo i lobogi luŋ,

³²Omio pee olunyo corre lobogi akaka kot, kede lutkot ame te bedo meny amenya i lobogi luŋ,

³³Ojwero olokgi kede odurogi luŋ, te daŋ tuturo yen i pottigi luŋ.

³⁴Dok te kobo ka kop keken bonyo apipim te corre i lobogi; lwak itino bonyo ame welgi mom kwanne,

³⁵gin te camo ginapita luŋ ame tye i lobogi, ocamo kit cammoro luŋ ame onwoŋo tye i lobogi.

³⁶Oneko itino kaogi luŋ ame co, ame gin obedo itino ame gin ogeo i tekogi me agege.

³⁷En te kwanyo jo Icrael kun omako ryal kede jabu, mom tye ŋattoro kadi acel i akina atekeregi ame ogatte.

³⁸I kare ame gin oya, jo Miciri cunygi obedo ayom, pien lworo onwoŋo ocirogi doŋ oko i komgi.

³⁹En oyaro pol malo i wi jo mere, dok omio mac me menyo piny i dyewor.

⁴⁰Kare ame gin okwae omiogi aluru, ocwayigi kwon adwoŋ meicel iya i polo me gin cam romgi.

⁴¹Oyabo lela pii te cako kukunya iye; pii-nono te mol i dye tim calo pii me kulo,

⁴²Pien en onwoŋo opoyo cikere mere acil kede amiro mere Iburaim.

⁴³Mannono te miyo en telo jo mere i yomcuny, otelo jo mere ame en oyero kun gin tye awero wer,

⁴⁴En te miyogi lobe a rok ocele, omiogi oleo cam ame tye i potti ame rok ocele en ame oyelle kede,

⁴⁵Me i agikki mere lwakkere lub cikkere, kun ogwoko gin ame en ociko luŋ, Pak wunu Rwot!