Read lango Jabuli 106 Bible Online

Jabuli 106 - lango bible

Jabuli 106

¹Pak wunu Rwot! Pwo wunu Rwot, pien en ber; Pien marrere a mom lokere perakino nakanaka.

²Ŋa ame twero kwano gin adoŋo luŋ ame Rwot otyeko timo? Ŋa ame twero pake i pak luŋ ame myero pake kede?

³Jo ame kitegi atira tye kede winyo, ame timo gin atye atira i kare ducu,

⁴Po pira, Ama Rwot, i kare me nyuto marri baŋ lwakki, konya an daŋ i kare ame ibino larogi iye;

⁵mia an daŋ anywak kedgi gum ame iyiko pirgi, me an daŋ alel i yomcuny, me an daŋ abed i kwogo i akina joni ame iyero me bedo megi.

⁶Wan karacel i kwariwa, wan luŋ obalo, wan luŋ otimo bal, otimo tim areco,

⁷Kwariwa i kare ame gin tye i Miciri, mom obedo paro pi ticcoro me awura ame yin ibedo tiyo; mom daŋ opo pi marri a mom lokere ame onwoŋo dwoŋ meicel, cite gin olunyo jem i kom ŋat Amalo Meicel i kare ame gin otuno i Nam Arema.

⁸Kadi amannono en te larogi i keto kwogo i nyiŋe, me wek en mi teko mere adwoŋ ŋeye.

⁹En ojuko pii i Nam Arema te two oko, en te telogi beo kan atut calo obeo i dye tim,

¹⁰Mannono te miyo en larogi i ciŋ okworgi, en olarogi i teko okworgi.

¹¹Pii te mwonyo okworgi oko, ŋattoro acel i akinagi mom te bwot.

¹²Mannono te miyo gin ye kop ame onwoŋo okobo; gin te cako wero wer me pake,

¹³Cite oyotoyot wigi te wil oko i tic ame en otio, mom oye kuro tam ame ya i baŋ Obaŋa.

¹⁴Ento olubo gigi mitgi ame tye i cunygi, ote bedo temo Obaŋa nakanaka i tim kuno.

¹⁵Obaŋa obedo miyogi gin ame gin okwao, cite ocwao too edeke i akinagi me pwodogi.

¹⁶I kare ame nyeko, omako jo i kom Muca kede i kom Aron ame Obaŋa oyero me telogi,

¹⁷lobo oŋamo doge te mwonyo Datan, te wumo jo Abiram ame ojem oko,

¹⁸Mac daŋ dok te cako lyel i akina jo ame ojem, maccono te waŋo otim tim areco oko,

¹⁹Gin otio pirgi kengi atin twon i Koreb, ote cako worogu cal jok ame otwako atwaka.

²⁰Gin oloko Obaŋa ame obedo me kwogo i kom cal twon ame camo lum,

²¹wigi te wil oko i kom Obaŋa ame olarogi, ame otimo gigi mogo adoŋodoŋo pirgi i Miciri,

²²otio gigi mogo me awura i wi lobo kan, kede gigi mogo ame neno iyiliyili i Nam Arema.

²³Omio Obaŋa okobo ni ebino tyekogi oko, kono onwoŋo Muca dano ame en oyero onwoŋo room tye, ame rik te cuŋ i nyim Obaŋa, kun laro pi lwakkere, me wek Obaŋa juk cunye kur tyekgi oko.

²⁴Gin rik te cayo lobo ame mio oko, kun mom otye kede iye kadi acel i kom gin ame Obaŋa oyiko.

²⁵Gin te bedo ŋuŋura i kemagi kun mom owinyo kop ame Rwot kobbigi.

²⁶Mannono omio Rwot otiŋo ciŋe malo te kwoŋ baŋgi, ni ebino miyogi oto oko i tim.

²⁷Dok daŋ ebino keketo iikwaegi akina rok apapat, kun emiogi olal i wi lobo luŋ.

²⁸Gin rik te ye woro jok Baal iyi Peor, kun ocamo riŋo ame oyalo i jo oto;

²⁹Mannono te miyo akemo mako Rwot i kom gin ame gin otimo-nono, too edeke te poto i akinagi.

³⁰Fenekaci te ya cako kwayo Obaŋa, too edeke te jwik oko,

³¹Mannono omio ote kwanne en daŋ i akina jo a kitegi atira, kun opo pire i kare a lwagi jo me kare ducu.

³²Gin omio akemo omako Rwot i dog pii me Meriba, mannono te miyo pwodo Muca pirgi;

³³gin omio cuny Muca obedo akec, eka te cako kobo koppogo ame onwoŋo myero mom ya i doge.

³⁴Gin rik mom te neko rok ocele, kite ame Rwot onwoŋo ocikogi kede,

³⁵ento gin te rubere oko i rok ocele, ote daŋ pwonyo timo gin ame gin timo.

³⁶Gin te cako woro cal jogigi, ame te lokere doko owic me mokogi.

³⁷Gin te bedo yalo cal jogi itino awobegi kede anyiragi, kun omio acalo mot me woro jogi:

³⁸Gin te onyo remo a jo apol ame mom i bal, oonyo remo awobegi kede me anyiragi, ame gin obedo ŋolo acalo mot me yalo cal jogi me Kanaan; pi remo a jo ame gin obedo oonyo-nono omio lobogi balle oko.

³⁹Gin daŋ ote doko jo ame cik ogeŋo pi gin ame gin obedo timo, obedo timo tim me alaya alaya.

⁴⁰Mannono te miyo akemo Obaŋa tugere i kom jo mere, en te cako dago jo ame eyero atek meicel,

⁴¹en te miyogi i ciŋ rok ocele, ame mannono te miyo jo ame onwoŋo dagogi cako loyogi.

⁴²Okworgi te wunogi atek meicel, te diyogi dwokogi i te locgi.

⁴³Obaŋa te bedo larogi kare i kare, cite gin omedde jem i kome kare-nono luŋ, mannono te miyo balgi medde dwokogi adwoka piny.

⁴⁴Kica dok te make i komgi i kare ame can opoto i komgi, i kare ame en owinyo kokogi.

⁴⁵En opo pi cikere mere pirgi, kica te make i komgi pi marrere a mom lokere ame dwoŋ meicel.

⁴⁶Rwot te miyo jo bedo i kica i komgi, jo luŋ ame onwoŋo oterogi iyi opii,

⁴⁷Larwa ba, Ama Rwot Obaŋawa cocokowa oko i akina rok ocele, me wek opwo nyiŋi acil, dok obed i kwogo me paki,

⁴⁸Pwo wunu Rwot, ame obedo Obaŋa a jo Icrael, pwoc wunu waŋ i waŋ! Me jo luŋ kob ni, “Amen!” Pak wunu Rwot.