Read lango Jabuli 107 Bible Online

Jabuli 107 - lango bible

Jabuli 107

¹Pwo wunu Rwot, pien en ber; pien marrere a mom lokere perakino nakanaka.

²Jo ame Obaŋa olaro myero kob kittono, jo ame en olakoro i can,

³Man kop a jo ame ocokogi i lobo a rok ocele, i tuŋ kide kede i tuŋ to, ituŋ anyarodi kede i tuŋ anyarolum.

⁴Jo mogo i akinagi te bedo loŋo piny i dye tim otwo, kun mom oromo nwoŋo yo me i wot paco moro a myero obedo iye,

⁵Oryo pii ocirogi, kec daŋ onekogi, ote doko agoro oko naka i cunygi.

⁶Gin te kok baŋ Obaŋa i kare ame gin tye i peko-nono, omio ote larogi iyi ayela ducu;

⁷Rwot te telogi i yo ame ocuŋ atir, tuno ka gin otuno i boma ame myero gin obed iye.

⁸Gin myero pwo Rwot pi marrere a mom lokere, pi tic me awura ame en otio pi dano.

⁹Pien en konyo ŋat ame oryo pii ociro, ŋat ame kec oneko en mio yeŋ i cammogo abeco.

¹⁰Jo mogo i akinagi obedo i mutu kede i pinny acol, onwoŋo otye acalo opii ame tye i can ame otweo kede jegele,

¹¹Pien gin onwoŋo ojem i kom kop ame onwoŋo Rwot Obaŋa okobo okwero winyo tam a ŋat Amalo Meicel.

¹²Gin onwoŋo doŋ ool oko i tic atek ame obedo tiyo; oŋoye doŋ piny aboŋo ŋattoro ame konyogi,

¹³Gin te cako kok baŋ Rwot i kare ame otye i peko-nono, Rwot te larogi i cangi,

¹⁴te kwanyogi oko i colpiny kede mutu, te codo jegele ame onwoŋo otweogi kede oko a waŋe acel.

¹⁵Gin myero opwo Rwot pi marrere a mom lokere, pi tic me awura ame en otio pi dano.

¹⁶Pien en oturo kika me mola oko luŋ, te ŋoŋolo nyonyo me cego doggola poko i dul aryo.

¹⁷Jo mogo i akinagi obedo twoye meicel pi balgi, can adwoŋ meicel opoto i komgi pi gin areco ame gin obedo timo,

¹⁸Gin obedo kwero kit cammo ducu, onwoŋo doŋ oceggi acega i dogcel me to.

¹⁹Gin te kok baŋ Rwot i kare ame otye i cannono, Rwot te larogi i cangi.

²⁰Rwot te caŋogi i kop ame en okobo akoba keken, eka te larogi oko i to.

²¹Gin myero pwo Rwot pi marrere a mom lokere, pi tic me awura ame en otio pi dano,

²²Gin myero omi mot baŋ Rwot me pwoye, ote bedo rabo pi gin ame en otio i wer me yomcuny.

²³Jo ocele i akinagi owoto i mel i dye nam, jo ame onwoŋo tio ticgi i nam adoŋo.

²⁴Gin te neno gin ame Rwot obedo timo, gigi mogo me awura ame en otimo i nam atut.

²⁵Pien en okobo ka kop keken, yamo ajuru te cako kodo, ame te miyo pii me nam tagere atek meicel.

²⁶Mel ame onwoŋo tye i nam te tiŋere ame doŋ ceggi acega i polo, ote dok dwogo donyo oko piny ite nam atut, cannono te miyogi doko jo agoro oko i cunygi.

²⁷Gin te cako cacapa atata kun ogate calo jo omer koŋo, kun mom doŋ otye kede ryeko moro kadi acel.

²⁸Gin te kok baŋ Rwot i kare ame otye i cannono, Rwot te larogi i cangi.

²⁹Rwot ojuko yamo ame onwoŋo akodo, pii i nam te kwe mot, bi-amwonyi te daŋ doŋ liŋ oko.

³⁰Cunygi doŋ te bedo ayom pi kwe a pii i nam oterogi naka i waŋ kwan kan ame gin onwoŋo omito wot iye.

³¹Gin myero pwo Rwot pi marrere a mom lokere, pi tic me awura ame en otio pi dano

³²Myero gin oket kwogo i kom Rwot i akina lwak ame ocokere, dok daŋ myero opake i cokere odoŋe;

³³En oloko anaka pii i kulo-gu odoko tim ame otwo ikaŋ, ojuko anaka pii ame onwoŋo mollo piny iyi akoŋ, pii iyie te two oko.

³⁴Lobo ame ceko cem atek meicel oloko odoko lobo ame obedo kadokado, man otimere pi bal a jo ame onwoŋo tye i lobo-nono.

³⁵En oloko kan ame otwo ikaŋ odoko kan ame pii poŋ iye, Lobo ame otal atar kia, odoko kan ame pii mollo iye,

³⁶En te miyo jo ame kec neko bedo kuno, gin te gero boma me bedogi iye;

³⁷Gin te coyo kotigi i potti, ote daŋ pito olok, camgi te cek abup meicel.

³⁸Rwot te miyogi gum omio gin te nya atek miecel. Rwot mom oye ni wel dokgi myero dok piny.

³⁹I kare ame oloogi, gin odoko goro, pi awuna ame owunogi kede, can kede cwercuny.

⁴⁰Rwot te cayo rwodegi, te miyogi wot i dye tim ata kan ame yo moro mom iye.

⁴¹Ento en laro jo ame piny oloogi i cangi, medo wel jo me otgi bedo acalo lwak rommi.

⁴²Jo ame cunygi ler, neno te yomoro cunygi, jo a kitegi reco te doŋ liŋ aliŋa,

⁴³Ŋat aryeka myero keto cunye me niyo jami magi, myero jo tam pi mar a Rwot ame mom lokere.