Read lango Jabuli 109 Bible Online

Jabuli 109 - lango bible

Jabuli 109

¹Baŋ adwoŋ wer: Man wer Jabuli ame Daudi owero. Ama Obaŋa, ame an apako, kur iliŋ mot!

²Jo a kitegi reco kede ogoba, ocako kobo kop me goba i koma, okobo ka kop me goba keken i koma.

³Otye ka cwero cunya i balo nyiŋa, odaga dok ocako lweny i koma kom nononono, kun mom aballigi ginnoro kadi acel.

⁴Obedo dotta adota kadi bed an amarogi, kadi i kare ame nwoŋo an atye akwayo pirgi,

⁵Mannono omio gin ocula i gin arac i gin aber, odaga-gu kun an amarogi.

⁶Yer ŋat arac me pid kede, mi ŋattoro arac i nyim okworrere kel i nyim oŋolkop.

⁷Mi dote kop te loye, mi kwaccere ame ekwao bed acalo bal ame etimo.

⁸Jwik kare me kwo mere oko bed acecek; mi ŋat ocele en ame luny leyo jami mere abeco.

⁹Mi itino mere dok itino kic, kede dako mere dok dako a cware oto,

¹⁰Mi itino mere bed rimo piny kun okwao jami akwa, mi ryemgi oko i wi obur ame onwoŋo gin bedo iye.

¹¹Mi lon a yam ekoporo jami mere oma jami mere oko luŋ, jo ame mom eŋeo oluny yako jami mere luŋ ame yam eyele kede.

¹²Kia myero kur mak ŋattoro i kome kadi acel, itino mere daŋ kur con ŋattoro.

¹³Mi ikwae luŋ to oko ducu, me nyiŋe rweny oko atwal i akina lwagi jo ame obino nywalo anyim.

¹⁴Rwot myero poyo bal a kwari mere daŋ, dok daŋ mom iye gonyo bal a tottere kadi acel.

¹⁵Mi Rwot opoyo balgi nakanaka, cite nyiŋe myero rweny oko atwal i lobo.

¹⁶Pien en rik mom oparo pi bedo kede kica, en rik obedo ryemo yo ocan kede jo ame piny oloo, karacel kede jo a cunygi cwer me aneka mere.

¹⁷En rik maro ceno jo, cennere-nono daŋ myero dok i wie, En onwoŋo mom mito lammi jo gum kadi acel, ŋattoro daŋ myero kur lamme gum.

¹⁸Ceno jo onwoŋo tye acalo koti mere ame en ruko, myero doŋ bid kome acalo pii, dok acalo moo ame bido cogo mere,

¹⁹Myero bed acalo boŋo ame en odwalo i kome; dok bed acalo del pyer ame en tweo i pyere nino ducu,

²⁰Man kono en obedo kite ame Rwot pwodo kede jo ame pidda nononono, jo ame kobo kop arac i koma kun omito rwenyo kwena.

²¹Ento yin, Ama Rwot Obaŋana, lweny pira pi gwoko nyiŋi, dok ilara pi marri a mom lokere pien ber.

²²Pien an acan ame piny oloo, cunya cwer meicel.

²³Awot i rwenyo calo tipo me otyeno, yamo kola oko calo bonyo.

²⁴Kanyo kec omio coŋa doŋ odoko agoro oko, koma doŋ riŋo mom iye,

²⁵Adoko doŋ gi-aŋala a jo ame dota, ka onena, oyeŋo doŋ wigi ayeŋa.

²⁶Konya, Ama Rwot Obaŋana, lara pi marri a mom lokere.

²⁷Migi oŋe ni yin en itye ka lara; migi one ni yin Rwot en ame itimo man,

²⁸Migi obedjo ame cena acena, ento kun imia gira gum, Mi ale twod jo ame lwenyo keda, me an amironi abed ame cunya yom.

²⁹Mi jo ame dota, ruk lewic acalo boŋogi, mi lewic bo komgi oko calo boŋo me adwala i kom.

³⁰Abino pwoyo Rwot meicel i dwon aloŋo, abino pake i akina jo ame ocokere.

³¹Pien en cuŋ i ŋet jo ame piny oloo i ciŋgi tuŋ cem, me larogi i ciŋ jo ame ŋolo kop me to i wigi.