Read lango Jabuli 111 Bible Online

Jabuli 111 - lango bible

Jabuli 111

¹Pak wunu Rwot. Abino pwoyo Rwot kede cunya ducu, i akina jo ame cunygi ler, i dye lwak ame ocokere karacel.

²Gin ame Rwot tio doŋodoŋo meicel. Jo luŋ ame ticcere-nono yomo cunygi, obedo keto cunygi me niaŋ iye.

³Ginnoro luŋ ame en tio tek dok me kwogo meicel, dok kite mere atira perakino waŋ i waŋ.

⁴En mom mio wiwa wil i kom ticcere luŋ ame en tio me awura, Rwot ber dok akica.

⁵En mio cam baŋ jo ame wore, dok daŋ wie mom wil i kom cikere mere kadi acel.

⁶En onyuto teko me ticcere baŋ lwakkere, pien omiogi lobo a rok ocele me bedo meggi.

⁷Ticcoro luŋ ame en tio tye atira dok me ateni, dok cikkere luŋ obedo gin me agena,

⁸oketo me bedo atwal kun perakino nakanaka, myero lubgi luŋ i cuny aler kede ateni.

⁹En ikome oyiko yo me laro jo mere, ocikere kedgi cikere ame perakino nakanaka, Nyiŋe cil dok iyiliyili meicel.

¹⁰Dano cako bedo kede ryeko ka ce ŋeo Rwot; jo ame lubo gin ame en ociko bino bedo kede niaŋ aber, gin bino bedo pake nakanaka.