Read lango Jabuli 115 Bible Online

Jabuli 115 - lango bible

Jabuli 115

¹Kwogo gire bed baŋi keken, Ama Rwot, kwogo myero pe bed megwa, pe myero bed megwa kadi acel, pi marri amom lokere kede pi atenini.

²Piŋo rok ocele bedo penyowa ni, “Obaŋagi kara tye kwene?”

³Obaŋawa wan tye i polo, en timo ginnoro luŋ ame en mito,

⁴Cal jogi obedo gin ame otio i mola kede ryal, dok obedo gin ame jo en ame tio i ciŋgi kengi.

⁵Doggi tye cite mom okobo; waŋgi daŋ tye cite mom neno ginnoro.

⁶Yitgi tye ento mom winyo kop; wumgi daŋ tye ento mom ŋweo ginnoro,

⁷ciŋgi tye ento mom mulo ginnoro; tyengi daŋ tye ento mom owoto kadi acel dwongi daŋ mom mor winyere kadi acel.

⁸Jo ame tiogi rom aroma kedgi, dok jo ame keto gengi i komgi daŋ rom aroma kedgi.

⁹Wun jo Icrael, gen wunu Rwot! En konyowu dok tye acalo kwot me gwoko komwu.

¹⁰Wun jo me ot Aron, myero igen wunu Rwot! En konyowu dok tye acalo kwot me gwoko komwu,

¹¹Wun jo luŋ ame lworo Rwot, gen wunun Rwot! En konyowu dok tye acalo kwot me gwoko komwu,

¹²Rwot pwod gire po i komwa, dok daŋ bino miyowa gum; en bino miyo gum baŋ jo me ot Icrael; en bino miyo gum baŋ jo me ot Aron;

¹³en bino miyo gum baŋ jo ame lworo Rwot, jo atino kede jo adoŋo.

¹⁴Rwot myero mi inywal immede wunu, wun karacel kede itinowu!

¹⁵Rwot myero miwu gum, Rwot ame oketo polo kede lobo.

¹⁶Polo obedo me Obaŋa gire, ento lobo en te miyo baŋ ikwae a dano.

¹⁷Jo ame oto, mom doŋ romo pako Rwot, akadi jo ame donyo piny i lobo kan ame olin iye aliŋa.

¹⁸Cite wan jo ame okwo obino pwoyo Rwot, cakere tin naka waŋ i waŋ. Pwo wunu Rwot.