Read lango Jabuli 118 Bible Online

Jabuli 118 - lango bible

Jabuli 118

¹Pwo wunu Rwot, pien en ber, marrere a mom lokere perakino nakanaka!

²Jo Icrael myero kob ni, “Marrere a mom lokere perakino nakanaka.”

³Jo me ot Eron myero kob ni, “Marrere a mom lokere perakino nakanaka.”

⁴Jo ame lworo Rwot myero kob ni, “Marrere a mom lokere perakino nakanaka,”

⁵I kare ame atye i can akok baŋ Rwot; Rwot ogamo kwacca te gonya oko,

⁶Rwot en akony mera, mom abino lworo ginnoro, ŋo kara ame dano twero tima kede?

⁷Rwot gire tye i ŋeta me konya; abino neno jo ame daga i waŋ me loc,

⁸Laro baŋ Rwot, ber gire, kato geŋo dano,

⁹Laro baŋ Rwot, ber gire, kato geŋo rwode.

¹⁰Rok luŋ onwoŋo ogura oko dyere, ento amio nyiŋgi orwenyo oko i wi lobo i nyiŋ Rwot.

¹¹Gin onwoŋo ogura oko dyere, gin onwoŋo ogura oko dyere, tuŋŋi kede tuŋŋi; amio nyiŋgi orwenyo oko luŋ wi lobo, i nyiŋ Rwot.

¹²Onwoŋo ogura dyere calo kic, obino i koma oyotoyot calo mac ame awaŋo tim, ento amio nyiŋgi luŋ orwenyo oko i wi lobo i nyiŋ Rwot.

¹³Onwoŋo ocorra meicel ame doŋ aceggi rette piny, cite Rwot te konya oko,

¹⁴Rwot en ame mia teko, dok en tye acalo werra ame awero, en doŋ odoko ŋat ame lara.

¹⁵Koŋ iwinyo wer me yomcuny ame owero pi loc, ame jo tye awero i kema a jo a kitegi atira, kun owero ni, “Ciŋ Rwot me tuŋ cem lwenyo atek meicel,

¹⁶twer me ciŋe-nono omiowa olo lweny, ciŋ Rwot me tuŋ cem lwenyo atek meicel!”

¹⁷Mom gire abino to, ento abino, bedo kwo, kun abedo tito gin ame Rwot otimo.

¹⁸Rwot doŋ otyeko pwoda arac meicel, cite mom gire oneka,

¹⁹Otimo mannono me wek eyabba doggola me kite atira, me adony iye ate wot pwoye.

²⁰Mannono en dogcel ame donyo baŋ Rwot, jo ame kitegi atira bino beo iye.

²¹Apwoi, pien yin doŋ igamo kwacca, doŋ ityeko doko ŋat ame lara.

²² Kidi ame ogedo okwero, en ame odoko kidi adwoŋ me gwic ot,

²³Man en tic a Rwot, eno gin me awura baŋwa.

²⁴Man en nino ame Rwot omiowa, myero okwer wunu nino man yomcuny adwoŋ meicel.

²⁵Ama Rwot, tim ber ilarwa! tim ber imi ticwa luŋ cobere kakare!

²⁶Pwo wunu ŋat ame bino i nyiŋ Rwot! Wan olamo winyo i komi i ot a Rwot.

²⁷Rwot en Obaŋa, en doŋ otyeko miyowa ceŋ. Dorre wunu i tyen kun imako wunu jaŋ yat i ciŋwu, wot iman wunu i keno me lam,

²⁸An abino pwoyi, pien yin ibedo Obaŋana, abino dworo nyiŋi, yin Obaŋana.

²⁹Pwo wunu Rwot, pien en ber marrere a mom lokere perakino nakanaka.