Read lango Jabuli 119 Bible Online

Jabuli 119 - lango bible

Jabuli 119

¹Jo ame mom tye i balloro, tye kede winyo, ame bedo kun lubo cik a Rwot!

²Jo ame gwoko kop me caden ame en omio tye kede winyo, jo ame yenye kede cunygi ducu,

³jo ame mom timo ginnoro arac, cite obedo kun olubo yo ame Rwot mito.

⁴Yin doŋ ityeko miyowa pwonnyi yam con, kun imito ni olub kede diro.

⁵Mi tyena cuŋ atek i yo ame atye ka lubo, kun agwoko daŋ i cwilli.

⁶Ka abino keto cunya me lubo cikki lewic mom bino maka,

⁷Abino paki kun cunya ler, ka doŋ atyeko pwonyo cikki ame tye atira-ni.

⁸Abino gwoko gin ame yin iciko, tim ber kur cunyi ca oko ite weka ata.

⁹Awobi ame pwod tidi twero gwoko kite aber odoco i yore aŋo? Twero gwokere ka ce bedo kun lubo koppi.

¹⁰An ayenyi kede cunya ducu, Ama Obaŋa, kur imi agak oko i yo me lubo cikki,

¹¹Atyeko kano koppi i cunya, me wek kur atim balloro i nyimi.

¹²An apwoi meicel, Ama Rwot; pwonya kede cikki.

¹³Abino kobo kede doga kannaler, kop ducu ame yam iciko kun yin ikomi en ame ikobo.

¹⁴Kop me cadenni ame inyuto yommoro cunya meicel, cunya yom iye calo lonyo adwoŋ ame alimo.

¹⁵Abino lwodo kop ame ipwonyo i cunya, ate keto cunya me lubo gin ame yin imito.

¹⁶Abino bedo i yomcuny i cik meri, wia gire mom bino wil i kom kop ame ikobo.

¹⁷Nyut marri baŋa an aticci, me wek abed kwo kun alubo koppi.

¹⁸Yab waŋa me anen piny, me anenjami me awura ame tye i cikki.

¹⁹An atye acalo welo i wi lobo kan, kur ikanna cikki moro kadi acel.

²⁰Cunya bedo pukere apuka kare ducu, kun amito niaŋ kop ame i ciko.

²¹Yin ityeko juko jo ame opala, ame gin jo ame doŋ ityeko ceno, jo ame gak oko i lubo cikki.

²²Kwany aŋalegi kede acaegi oko i koma, pien an abedo gwoko kop me caddenni,

²³Kadi bed rwode ocokere karacel te bedo poro kop me timo gin arac i komi, cite an amironi pwod abino medde lwodo kop me cikki i cunya,

²⁴Kop me cadenni yommoro cunya meicel, an anwoŋo tam abeco iya iye.

²⁵Abuto piny iyi apua ame cwercuny ocira oko, roc kwona odoco kite ame yam iciko.

²⁶Kare ame atucci ginnoro luŋ ame yam atio, yin igamo doga, pwonya kede cikki.

²⁷Pwonya me aŋe yo ame myero alub kede pwonnyi, mannono bino miyo abedo lwodo kop i kom ticci ame doŋ ityeko tiyo.

²⁸Cwercuny doŋ omio cunya oballe oko, mia teko, kite ame yam iciko.

²⁹Kwanya oko me kur alub yo mogo a mom beco, cite myero ipwonya i cikki pi kicani.

³⁰An doŋ atyeko yero me lubo yo ame gen tye iye, kun aketo cunya meicel i kom gin ame i ciko.

³¹An doŋ atyeko moko oko ikiŋ i kom kop me cadenni, kur iwek lewic maka.

³²Abino bedo lubo cikki i mitkom, ka ce yin imedo niaŋa obedo atut.

³³Pwonya, Ama Rwot, me aŋe kite me lubo cikki, mannono bino miyo agwoko naka iyi agikki.

³⁴Mia aniaŋ cikki me wek agwoki, me alub i cunya ducu.

³⁵Tela i yo me lubo cikki, pien yomoro cunya meicel,

³⁶Mia abed i cuny me lubo kop me cadenni, me kur abed i cuny me nwoŋo ka lim,

³⁷Kur imia abed neno jami atata ame konygi mom, mia abed i kwo me timo gin ame yin imito,

³⁸Med moko gin ame iciko baŋa an amironi, ame ityeko ciko pire pi jo ame llwori.

³⁹Kwany tim me acae oko ame mia lworo, pien cikki ducu beco.

⁴⁰Nen ba, cunya bedo pukere apuka kom cikki, yin kiteni atira, myero imia kwo.

⁴¹Tim ber, Ama Rwot, imi marri a mom lokere bed koma, dok ilara kite ame yam iciko con;

⁴²mannono bino miyo agamo dog jo ame kobo kop agecegece i koma, pien an ageno koppi.

⁴³Kur ikwany kop me ateni oko i doga, pien genna tye i kom cikki.

⁴⁴Abino medde gwoko cikki kare ducu nakanaka, abino gwoko nakanaka,

⁴⁵Abino beo i yo apwot kun atye i kuc, pien doŋ atemo lubo pwonnyi.

⁴⁶Abino rabo kop me cadenni i nyim obakki, kun lewic mom maka kadi acel.

⁴⁷Pien an anwoŋo yomcuny i cikki, ame cunya maro meicel,

⁴⁸Aworo cikki meicel, dok daŋ amaro, abino lwodo kop me cikki cunya.

⁴⁹Poyo koppi ame yam icikere kede baŋa, an amironi, ame yin imia acako bedo kede gen iye.

⁵⁰Kadi atye i can, koppi kweo cunya, cikkereni mia akwo.

⁵¹Jo ame kwia Obaŋa nywara anywara, cite an, mom aweko gwoko cikki kadi acel.

⁵²Ka atamo pi cikki ame yam ipwonya kede con, cunya kwe odoco, Ama Rwot.

⁵³Cunya waŋ meicel i kom jo a kitegi reco, ame pe paro pi cikki,

⁵⁴Cikki doŋ tye acalo wer ame awero, i ot ame abedo iye acalo arok ame bor abora i paco mere.

⁵⁵Apo piri naka dyewor, Ama Rwot, dok daŋ alubo cikki,

⁵⁶Mannono en gum ame an anwoŋo, omio atye ka gwoko kop ducu ame iciko.

⁵⁷Yin en ame ibedo gin ame opokka, Ama Rwot, atyeko cikere me gwoko kopporo luŋ ame yin ikobo.

⁵⁸Akwai i cunya ducu, Rwot me polo, kica myero maki i koma kite ame yam iciko.

⁵⁹Ka aparo pi gin ame yin imito ni atim, alokere me lubo kop me cadenni;

⁶⁰Aru ya oyotoyot kun mom agal, ate cako lubo cikki oko,

⁶¹Kadi bed amok iyi owic a jo areco, wia mom wil i kom cikki kadi acel.

⁶²I cuny dyewor, an aya malo me paki, pi cikki me ŋolo kop atira.

⁶³An abedo awot a jo luŋ ame lwori, dok ame lubo gin ame i pwonyo.

⁶⁴Lobo doŋ opoŋ i marri a mom lokere, Ama Rwot, pwonya kede cikki.

⁶⁵Yin itye amironi aber, Ama Rwot, itio kede kun ilubo koppi.

⁶⁶Pwonya me ŋolo kop atira, kun atye kede ŋec, pien an aye gin ame yin iciko.

⁶⁷I kare ame mom ru iketo can i koma, onwoŋo doŋ agak oko, cite aman doŋ agwoko koppi,

⁶⁸Yin gire iber, dok itimo daŋ gin aber; pwonya kede cikki.

⁶⁹Jo ame mom ŋei, okobo kop me gobagoba i koma, cite an gira alubo cikki kede cunya ducu.

⁷⁰Jo-nono cunygi omakere oko calo dwolo, cite an gira yia yom i cikki.

⁷¹Can ame rik opoto i koma-ca onwoŋo kara ber, pien okonya me pwonyo cikki.

⁷²Cik ame ya i dogi ber baŋa, ame kato lwak jabu kede ryal apipim.

⁷³Yin en icwea dok daŋ yin en igwoka, mia abed i niaŋ atut me wek apwony cikki.

⁷⁴Jo ame lwori bino nena cunygi te bedo ayom, pien an abedo geŋo koppi.

⁷⁵Ama Rwot, an aŋeo ni yin iŋolo kop kakare, dok daŋ iketo can i koma pi ateni ame yin itye kede,

⁷⁶Mi marri a mom lokere bed oyikere me kweyo cunya, kite ame rik iciko kede baŋa, an amironi.

⁷⁷Tima kica, iweka abed kwo, pien cikki en ame yomoro cunya.

⁷⁸Mi lewic mak jo a mom ŋei, pien gin obedo bwola i kop me goba, aco an gira abino lwodo ka kop i kom kop ame ipwonyo keken i cunya.

⁷⁹Mi jo ame lwori bin baŋa, me gin daŋ obin oŋe kop me cadenni,

⁸⁰Balloro myero kur nwoŋere i cunya pi kwero cikki, me kur ibin imi lewic maka.

⁸¹Tipona ool oko me kuro larreni, Ama Rwot, an gira ageno kop meri.

⁸²Waŋa doŋ oballe oko pi bedo neno gin ame iciko, omio apenyi ni, “Kara ibino kweyo cunya awene ba?”

⁸³Nen doŋ adoko calo ocoe me piko koŋo olok ame oweko i atuk, kadi amannono, wia gire mom owil i cikki.

⁸⁴Kara an amironi abino bedo kuro naka awene ba? Kara ibino ŋolo kop a jo ame wuna awene ba?

⁸⁵Jo ame mom ŋei yin Obaŋa, okunyo bur pira me apot iye, kun mom oparo gigi pi cikki.

⁸⁶Cikki ducu tye kakare, ento gin olwenyo i koma i kop me gobagoba; konya ba.

⁸⁷Onwoŋo doŋ oceggi kwanyo kwona oko i lobo, cite an mom aye weko gin ame ipwonyo.

⁸⁸Tim ber ikonya, igwok kwona pi marri a mom lokere, me an daŋ agwok kop me caden ame yam yin ikobo.

⁸⁹Koppi bedo nakanaka, Ama Rwot, tye ame icibo ocuŋ oko ikiŋ i polo,

⁹⁰Kop atenini ame yin itye kede perakino waŋ i waŋ, i kare a lwagi jo me kare ducu, icibo lobo ocuŋ atek i kabedo mere.

⁹¹Jami ducu ocuŋ naka atot tin pi cikki, pien gin luŋ obedo omironi.

⁹²Kono onwoŋo cikki mom yomoro cunya, kono nyo ato oko i canna,

⁹³Wi mom bino wil i kom cikki kadi acel, pien gwoka omio pwod atye kwo.

⁹⁴An a danoni, lara ba; pien an abedo lubo cikki keken.

⁹⁵Jo a kitegi reco opono kun okia me neka, cite an atamo gira pi kop me cadenni.

⁹⁶Doŋ atyeko neno ni jami i wi loboni luŋ kadi bed ber meicel tye kede agikkigi, ento cikki agikki mere mom.

⁹⁷Nen ba, nen kite ame an amaro kede cikki! abedo lwodo kop i kom cikki i cunya ceŋ iyul.

⁹⁸Cikki mia abedo ŋat aryek ame kato okworra oko, pien itye keda kare ducu,

⁹⁹Atye i niaŋ atut ame kato me opwonyena oko, pien an abedo lwodo kop me cadenni i cunya kare i kare.

¹⁰⁰Dok niaŋ ame an atye kede kato me a jo oteggo oko, pien an alubo gin ame yin iciko.

¹⁰¹An ajukere kena me wot timo gin arac, pien amito lubo kop atenini.

¹⁰²Pe awire teŋe ate weko cikki oko, pien yin doŋ ityeko pwonya,

¹⁰³Koppi ka an abilo anwoŋo lim meicel, lim i doga ame kato moo kic oko,

¹⁰⁴Cikki pwonya i ryeko adwoŋ meicel, mannono omio adago lubo yo areco ducu.

¹⁰⁵Koppi calo tara ame menyo kan ame an awoto iye, dok tye acalo ceŋ amenyo yo ame awot iye.

¹⁰⁶Doŋ atyeko kwoŋo kwoŋ, dok daŋ amoko pire, me Jubo pwonyi ame tye atira.

¹⁰⁷Peko ame atye kede omio rem ocira oko, gwoka me abed kwo, Ama Rwot, kite ame yam iciko.

¹⁰⁸Gam motta me pak ame akelo baŋi, Ama Rwot, dok ipwonya kede cikki, Ama Rwot.

¹⁰⁹Atye ame amako kwona i ciŋa kare luŋ, cite wia mom wil i kom cikki.

¹¹⁰Jo areco tye ociko owic me maka, cite an mom agak me weko lubo gin ame ipwonyo.

¹¹¹Kop me cadenni obedo gin ame an aleo me bedo mega nakanaka, ateteni, kop me cadenni en ame mia lelo i cunya.

¹¹²Aketo cunya kare luŋ me lubo gin ame yin iciko, abino timo amannono nakanaka i agikki me kwona.

¹¹³Cunya dag jo ame tamo tamgi aryo, ento an amaro cikki,

¹¹⁴Yin en ibedo ka ponona kede kwot me geŋo koma, genna tye i kom kop ame ikobo

¹¹⁵Ya wunu oko i ŋeta, wun otim tim areco, me abed kun alubo cik a Rwot Obaŋana.

¹¹⁶Konya acuŋ atek kite ame yam ibedo ciko me abed kwo, kur imi ket lewic i koma pi gen ame atye kede,

¹¹⁷Tiŋa malo, me abed i kuc, me aketo cunya me lubo cikki kare luŋ.

¹¹⁸Cunyi otyeko kwero jo ame gak teŋe i lubo cikki, pien ryeko ame gin tye kede mom konyo ginnoro kadi acel.

¹¹⁹Jo areco me wi lobo rom aroma i yugi, mannono omio an gira amaro kop me cadenni,

¹²⁰Rino koma luŋ myel amyela pi lwori, ŋolo koppi daŋ tye ka miya lworo meicel.

¹²¹Atyeko timo gin ame tye atira dok kakare; kur iweka baŋ jo ame tye ka wuna,

¹²²cuŋ pira, an aticci, pi kelli kuc, kur iwek jo ame mom ŋei bed wuna.

¹²³Waŋa doŋ ojony oko me bedo kuro larreni, kede pi kite ame ibino cobo kede cikki ame tye atira.

¹²⁴Ti keda an aticci pi marri a mom lokere, dok ipwonya kede cikki.

¹²⁵An abedo amironi, mia abed kede niaŋ atut, me wek aŋe koppi me cadenni.

¹²⁶Kare doŋ oromo oko, me tiyo ticci, Ama Rwot, pien cikki doŋ otyeko turo oko.

¹²⁷Mannono omio an amaro cikki gira, amaro ame kato jabu, naka jabu ame olio aber.

¹²⁸Mannono omio an alo kwona kun alubo cikki, adag gira timo tim areco luŋ.

¹²⁹Koppi me caden luŋ tye me awura meicel, mannono omio alubo kede cunya ducu.

¹³⁰Niaŋ tyen koppi yabo waŋ dano, mio ŋat amwol bedo kede niaŋ atut.

¹³¹Aŋamo doga, ate bedo omo cunya me weo, pien cunya tye i kom cikki,

¹³²Lokere baŋa, dok itima kica, kite ame itimo i kom jo ame mari,

¹³³Tella yo kite ame yam iciko, me balloro kur lo kwona.

¹³⁴Lakoro an oko i ciŋ jo ame wuna, me alub gin ame ipwonyo.

¹³⁵Nena an amironi, i waŋ me kica, dok ipwonya i cikki.

¹³⁶Nen pig waŋa tye ka cwer kun aony irat calo pii, pien jo mom tye ka gwoko cikki.

¹³⁷Yin giri kiteni atira, Ama Rwot, dok daŋ iŋolo kop atira.

¹³⁸Iyero kop me cadenni, kun ilubokite atira, dok koppi luŋ obedo kop ateni.

¹³⁹Miti ame an atye kede i kom cikki puko cunya apuka, pien okworra, wigi wil oko i kom koppi.

¹⁴⁰Gin ame yin iciko, icobo luŋ, an amironi, cunya tye iye.

¹⁴¹An atidi dok daŋ oca meicel, kadi amannono an gira wia mom wil i cikki.

¹⁴²Kiteni atira tye atir, dok daŋ perakino nakanaka, dok cikki daŋ tye ateni,

¹⁴³Can kede cwercuny otum oko i koma, cite cikki en ame yomoro cunya.

¹⁴⁴Kop me cadenni tye atira nakanaka, mia abed i niaŋ atut me abed kwo.

¹⁴⁵Akok baŋi i cunya luŋ, gam doga, Ama Rwot, an abino gwoko cikki.

¹⁴⁶Akok baŋi, tim ber ilara; me wek abed lubo kop me cadenni.

¹⁴⁷Aya malo ibai ate kok baŋi me konya, an pwod atye kede gen i kom koppi,

¹⁴⁸Aco waŋa te bedo twolo kun piny mom ru oru, me wek abed lwodo kop i kom cikkereni i cunya,

¹⁴⁹Tim ber iwiny dwona, Ama Rwot, pi marri a mom lokere; locci ame tye atira rocco kwona,

¹⁵⁰Jo ame wuna, tye doŋ ceggi acega kun otye i tam me timo gin arac i koma, gin mom oparo pi cikki kadi acel.

¹⁵¹Cite yin itye ceggi, Ama Rwot, cikki ducu obedo cik me ateni.

¹⁵²Acako pwonyo kop i kom cadenni con meicel, pien yin ityeko ketogi me bedo nakanaka.

¹⁵³Nen can ame atye kede dok ilara, pien wia mom wil i kom cikki.

¹⁵⁴Pid pira, dok ilara, mia kwo kite ame yam iciko,

¹⁵⁵Otim tim areco mom bino larre kadi acel, pien gin gigi mom oparo pi cikki.

¹⁵⁶Ento kica meri dwoŋ meicel, Ama Rwot, imia akwo kite acalo yin iŋolo kede kop atira-ni.

¹⁵⁷Okworra kede jo ame wuna pol meicel, cite an gira mom aweko lubo kop me cadenni.

¹⁵⁸Ka aneno jo ame mom geni, cunya lema meicel, pien gin mom ogwoko cikki.

¹⁵⁹Koŋ ipar kite ame an amaro kede kop ame ipwonyo, Ama Obaŋa, gwok kwona kite ame marri a mom lokere tye kede.

¹⁶⁰Koppi luŋ ocuŋ iyi ateni, ŋolo kop atira ame yin iŋolo perakino nakanaka.

¹⁶¹Rwode wuna nononono aboŋo ginnoro ame abalo, cite an gira abedo kede lworo cunya pi koppi.

¹⁶²Alelo gira alela i koppi, calo ŋat ame onwoŋo gin ame oyako abup meicel.

¹⁶³Adag dok atyeko kwero kop me gobagoba, ento amaro gira cikki.

¹⁶⁴An apaki tyen abiro nino acel, pien kop ame ikobo tye atira,

¹⁶⁵Jo ame maro cikki bedo i kuc adwoŋ meicel, mom tye ginnoro atwero miyogi twomere.

¹⁶⁶An gira ageno larre meri, Ama Rwot, dok daŋ atimo gin ame cikki mito ni atim.

¹⁶⁷Kop me cadenni ame tye i cikki luŋ agwoko gira i cunya, amarogi atek meicel.

¹⁶⁸Agwoko cikki luŋ karacel kede kop me caden, ame ipwonya kede, yin gire ineno ginnoro luŋ ame an atimo.

¹⁶⁹Ye kokona otun i nyimi ba, Ama Rwot, mia abed kede niaŋ atut kit ame koppi tye kede.

¹⁷⁰Ye kwacca ame abako kede doga baŋi tun i nyimi, lara kite ame yam iciko kede.

¹⁷¹An apaki kare ducu i kop ame ya i doga, me ipwonya kede cikki.

¹⁷²Abino wero koppi awera kede doga, pien cikki luŋ tye atira.

¹⁷³Yik ciŋi me konya, pien an atyeko yero me lubo cikki.

¹⁷⁴Akuro kom ka larreni keken, Ama Rwot, dok gin ame yomoro cunya, obedo cikki.

¹⁷⁵Mia abed kwo me wek amedde paki, me gin ame cikki pwonyo okonya.

¹⁷⁶Atyeko gak oko teŋe calo romo ame orwenyo, yenya, an amironi, pien wia mom wil i kom cikki.