Read lango Jabuli 12 Bible Online

Jabuli 12 - lango bible

Jabuli 12

¹Baŋ adwoŋ wer: Man wer a Daudi ame owero Konya Ama Rwot, pien ŋattoro doŋ mom ame geni, pien jo ame geŋo doŋ oto otum oko i akina joo

²Nen ŋat acel acel tye ka kobo kop goba baŋ awottere, kop i doggi lim calo kic, aco cunygi nwoŋo okaro aryo.

³Rwot myero ŋol leb ame lebo kop amit wokkono oko, kop ame ya i dog ame mio dano wakere wok-ki,

⁴jo ame kobo ni, “Obino loyo kop i kop a ya i dogwa, lebwa gire tye me konyowa, kara ŋa ocele ame dok tye acalo adwoŋwa?”

⁵“Pien gin oyako ocan, dok jo ame kec neko tye ka cucura, mannono omio abino doŋ ya malo, ‘Rwot okobo, Abino doŋ gwokogi kite ame gin mito.’ ”

⁶Gin ame Rwot ociko, ber, calo ryal ame olio acil i mac, ame olio tyen abiro twal.

⁷Gwokwa aber, Ama Rwot, Gwok joni me kare luŋ nakanaka.

⁸Otim tim areco tye wirre tuŋŋi i tuŋŋi, kun oyenyo jo, kite ame jo tye ka pwoyo kodi timmono apwoa-ni.