Read lango Jabuli 135 Bible Online

Jabuli 135 - lango bible

Jabuli 135

¹Pak wunu Rwot, Pak wunu nyiŋ Rwot, pak wunu nyiŋe, wun omiro mere ducu,

²wun ame icuŋ wunu i ot a Rwot, i dyekal me ot Obaŋawa!

³Pak wunu Rwot, pien en ber, wer wunu wer me pako nyiŋe, pien en akica!

⁴Pien Rwot otyeko yero Yakobo me bedo mege en ikome, jo Icrael obedo lwakkere en ikome.

⁵Pien an aŋeo gira ni Rwot dwoŋ meicel, dok daŋ aŋeo ni Rwot loo cal jogi ducu ame olwoŋo ni Obaŋa,

⁶Ginnoro keken ame en Rwot mito, timo, i polo karacel kede i lobo, i nam kede i pii atut ame tye piny i te lobo.

⁷En ame mio pol tiŋere malo i agikki lobo, en ame mio lutkot meny, kot te cwe, en acwao yamo i ot kano jami mere, yamo te kodo.

⁸En ame rik oneko itino kao me Miciri, itino kao a dano kede me a leyi;

⁹en daŋ rik otio taŋo kede gigi mogo me awura meicel i Miciri, kun pwodo kede Parao karacel kede omiro mere ducu.

¹⁰En daŋ rik oneko rok apapat apol meicel, oneko naka obakki mogo ame tek meicel.

¹¹Cikon, abaka a jo Amor, kede Oga baka a jo Bacan, kede oloc ducu ame loo lobo apapat ame tye i Kanan.

¹²Omio lobogi oko me bedo me alea, omio me bedo me alea a jo mere Icrael.

¹³Nyiŋi gire perakino nakanaka, Ama Rwot, dok nyiŋi daŋ medde i rwo i kare a lwagi jo me kare ducu.

¹⁴Pien Rwot bino miyo jo mere loo kop, kica bino make i kom omiro mere,

¹⁵Cal jogi a rok apapat, obedo gin ame otio i ryal kede jabu, dok jo en ame otio kede ciŋgi kengi.

¹⁶Doggi tye cite mom okobo, waŋgi daŋ tye, cite mom oneno ginnoro.

¹⁷Yitgi tye, cite mom owinyo kop; wumgi daŋ tye, cite mom oweo kadi acel.

¹⁸Jo ame tiogi, rom aroma kedgi, dok jo ame keto gen i komgi daŋ rom aroma kedgi.

¹⁹Wun jo Icrael, gen wunu Rwot! Wun jo me ot Aron, myero igen wunu Rwot!

²⁰Wun jo me ot a Levi, gen wunu Rwot! Wun jo luŋ ame lworo Rwot, gen wunu Rwot!

²¹Pwo wunu Rwot i Cion, pien en bedo i Jerucalem! Pwo wunu Rwot!