Read lango Jabuli 136 Bible Online

Jabuli 136 - lango bible

Jabuli 136

¹Pwowunu Rwot, pienenber, marrere a mom lokere perakino nakanaka.

²Pwo wunu Obaŋa ame loo obaŋe ocele luŋ, pien marrere a mom lokere perakino nakanaka.

³Pwo wunu Rwot ame loo rwode luŋ, pien marrere a mom lokere perakino nakanaka.

⁴En kene ame tio gigi mogo me awura meicel, pien marrere a mom lokere perakino nakanaka.

⁵En oketo polo kede ryeko mere, pien marrere a mom lokere perakino nakanaka,

⁶en opepeto lobo me wumo pii atut ame tye piny, pien marrere a mom lokere perakino nakanaka,

⁷en oketo gigi mogo adoŋo ame ryeny menyo piny, pien marrere a mom lokere perakino nakanaka,

⁸en oketo ceŋ me loyo dyeceŋ, pien marrere a mom lokere perakino nakanaka,

⁹en oketo dwe kede acer me loyo dyewor, pien marrere a mom lokere perakino nakanaka,

¹⁰en oneko itino kao awobe me Miciri, pien marrere a mom lokere perakino nakanaka;

¹¹eka te kwanyo jo Icrael oko i akinagi, pien marrere a mom lokere perakino nakanaka;

¹²kun kwanyogi pi teko me bade kede ciŋe ame oryeo; pien marrere a mom lokere perakino nakanaka.

¹³En opoko nam arema aryo i dyere, pien marrere a mom lokere perakino nakanaka;

¹⁴te miyo jo Icrael kato i dyere naka loka tuŋ-ca; pien marrere a mom lokere perakino nakanaka;

¹⁵ento Parao kede monnyere te miyo mwony oko i Nam Arema pien marrere a mom lokere perakino nakanaka.

¹⁶En ame rik otelo lwakkere i dye tim, pien marrere a mom lokere perakino nakanaka;

¹⁷en ame oneko twoni obakki mogo adoŋo doŋo; pien marrere a mom lokere perakino nakanaka;

¹⁸en daŋ oneko obakki mogo ame rik ŋeye meicel, pien marrere a mom lokere perakino nakanaka;

¹⁹oneko Cikon, ame obedo abaka a jo Amor, pien marrere a mom lokere perakino nakanaka;

²⁰oneko daŋ Og, ame obedo abaka a jo Bacan, pien marrere a mom lokere perakino nakanaka;

²¹omio lobogi oko me alea a lwakkere, pien marrere a mom lokere perakino nakanaka;

²²omio me alea baŋ jo mere ame obedo jo Icrael; pien marrere a mom lokere perakino nakanaka;

²³en ame rik opo pirwa i kare ame doŋ otye arac meicel, pien marrere a mom lokere perakino nakanaka;

²⁴eka te larowa i ciŋ okworwa, pien marrere amom lokere perakino nakanaka.

²⁵En ame mio cam baŋ ginnoro luŋ ame tye kwo, pien marrere a mom lokere perakino nakanaka;

²⁶Pwo wunu Obaŋa me polo, pien marrere a mom lokere perakino nakanaka.