Read lango Jabuli 139 Bible Online

Jabuli 139 - lango bible

Jabuli 139

¹Baŋ adwoŋ wer. Man wer ame Daudi owero. Ama Rwot, yin iŋia, ite daŋ ŋeya!

²Yin iŋea kadi abedo piny onyo aya malo, yin gire iŋea; yin iniaŋ tam ame tye i cunya oko i kannabor.

³Yin iŋio kwona kede butona piny, iŋeo doŋ aber kite ame an abedo kede ducu,

⁴Kudi ame mom ru akobo kopporo, yin doŋ iŋeo koppa luŋ i yore i yore, Ama Rwot,

⁵Yin ityeko gura oko dyere tuŋ nyima kede i ŋea, ciŋi mom rwenyo i koma me gwoka,

⁶Ŋec ame yin itye kede-nono, malo meicel i tuŋ baŋa, malo meicel, ame an mom aromo niaŋ iye kadi acel.

⁷Atwero wot kwene me pono i baŋi? Abino riŋo kwene me riŋo i nyimi?

⁸Kadi ayit malo i polo, yin itye kuno! Kadi abut piny i lyel, yin daŋ itye kuno!

⁹Kadi atwarre awot malo calo ru-a piny, ate wot bedo i dog nammoro ame tye kannabor meicel,

¹⁰kuno daŋ ciŋi pwod bino tela, ibino bedo tye kuno me konya i ciŋi tuŋ cem,

¹¹Ka ce akobo ni, “Colpiny en ame myero doŋ wuma, dok lero piny ame atye iye dok oko acol,”

¹²colpiny daŋ mom tye acalo colpiny baŋi, i baŋi dyewor rom aroma dyeceŋ; pien colpiny rom aroma i lero baŋi.

¹³Pien yin en iyiko dul koma ducu, yin en ame icwea iyi totta.

¹⁴Abino paki, pien yin en ibedo gi-alwora kede me awura meicel! Itio tic me awura okato kare! Yin iŋea aber odoco;

¹⁵yin iŋeo kite ame cogo koma okukuba kede luŋ, i kare ame ocwea iyi totta, i kare ame ocweo koma i muŋ i twon diro adwoŋ meicel, piny i te lobo.

¹⁶Ineno koma kede waŋi kun mom ru ocweo otum, dul koma acel acel tye ocoo oko i bukki, kun dul koma moro mom ru ocweo onwoŋo doŋ imoko kare me kwona oko.

¹⁷Tammi malo nadi, Ama Obaŋa! welgi gire mom romo kwanne kadi acel.

¹⁸Ka ce akobo ni akwano welgi, welgi pol kato kwoyo oko. Ka ce aco i waŋ nino, nwoŋo pwod atye baŋi.

¹⁹An onwoŋo amito ni kono ineko jo areco oko, Ama Obaŋa, me jo ame onyo remo a jo wadgi, rwenyo oko i baŋa,

²⁰gin jo-nono obedo kobo kop areco i komi, Ama Rwot, otiŋere malo kun okobo kop arac ame balo nyiŋi.

²¹Ama Rwot, an mom adago jo ame dagi? Dok cunya mom okwero jo ame mito lweny i komi?

²²An adagogi i cunya ducu; gin tye acalo okworra.

²³Ŋi kwona i diro, Ama Obaŋa, me iŋe gin ame tye i cunya, koŋ itema, me iŋe kan ame tam tye iye.

²⁴Me inen ka atye ka umo ginoro ame rac, ite tela i yo ame parakino nakanaka.