Read lango Jabuli 143 Bible Online

Jabuli 143 - lango bible

Jabuli 143

¹Man wer ame Daudi owero, Winy kwacca, Ama Rwot; winy kwacca ame abako kede doga i nyimi, pi gen ame yin itye kede, gam doga; kite acalo yin kiteni atira.

²Kur icak ŋolo kop i kom amironi; pien mom tye dano moro akwo ame kite atira i nyimi.

³Pien akwor tye ka ryemo yora, odia doŋ okato kare, omia doŋ abedo kannacol calo dano ame yam otyeko to con.

⁴Mannono omio cunya doŋ odoko agoro meicel, mom dok atye kede ginnoro i cunya kadi acel.

⁵Apo doŋ i kom kare mogo ame doŋ okato oko con, ate bedo lwodo kop i cunya i kom gigi mogo ame yin itimo, ginnoro luŋ ame yin itimo bino i tamma.

⁶Aryeo ciŋa kun ataŋo baŋi i kare me kwayi, keo me neni omio cunya two atowa calo lobo ame pii mom iye.

⁷Ama Rwot, ru ba gamo doga, cunya doŋ amito cot oko! Kur iponna oko ba, naka mia abedo calo jo ame awot donyo piny i lyel.

⁸Mia awiny pi marri a mom lokere odiko con, pien an genna tye i komi, Pwonya me lubo yo ame yin imito, pien an acwao kwacca luŋ baŋi.

⁹Lara ba, Ama Rwot, i ciŋ okworra! An doŋ atyeko riŋo alaro baŋi.

¹⁰Pwonya me timo gin ame yin imito, pien yin ibedo Obaŋana! Mi cunnyi aber en ame tela, i yo ame oporre arorom!

¹¹Gwok kwona ba, Ama Rwot, pi nyiŋi, kwanya oko i can i kiteni atira!

¹²Pi marri a mom lokere, mi waŋ okworra rweny oko i akina turgi, nek okworra luŋ ityek oko ducu, pien an abedo amironi.