Read lango Jabuli 145 Bible Online

Jabuli 145 - lango bible

Jabuli 145

¹Man wer ame Daudi owero. Abino wero wer me dwori, Ama Obaŋana kede Abakana, abino pako nyiŋi nakanaka.

²Abino pwoyi nino ducu, dok abino pako nyiŋi nakanaka.

³Rwot dwoŋ meicel, dok myero daŋ pake meicel, dwoŋŋere mom romo kobere kadi acel.

⁴Lwagi jo me kare i kare bino pako tic ame yin itio baŋ itinogi, kun otittigi ticcogo adoŋodoŋo ame yin itio.

⁵Cunya bino lwodo kop i kom ticcogo me awura ame yin itio, kede i kom kwogo me dwoŋ a locci.

⁶Jo bino rabo kop i kom ticcogo ame iyiliyili ame yin itio, an daŋ abino titto pi ditti.

⁷Gin bino miyo berri rwo meicel i kabedo ducu, kun daŋ owero i dwon aloŋo pi kiteni atira.

⁸Rwot akica dok maro dano, akemo mom mako oyot, dok marrere a mom lokere, dwoŋ meicel.

⁹Rwot ber baŋ jo ducu, dok kica make i kom ginnoro luŋ ame en oketo.

¹⁰Ginnoro luŋ ame yin itio, bino pwoyi, Ama Rwot, dok joni luŋ acil bino paki.

¹¹Gin bino kobo kop i kom kwogo me locci, kun daŋ otito pi twer ame yin itye kede,

¹²me jo luŋ ŋe twer me ticci, kede kwogo adwoŋ ame tye i locci,

¹³Locci obedo loc ame perakino nakanaka, pi lwagi a jo me kare ducu, Rwot genne i ginnoro luŋ ame en kobo, dok daŋ kica mako ticcere luŋ ame en tio.

¹⁴Rwot mako jo ame mito rette piny, dok mio jo luŋ ame piny oloo ya malo.

¹⁵Jo luŋ ciko waŋgi i komi, yin imiogi cam i kare ame gin mito ikokome.

¹⁶Yin iyaro ciŋi, imio ginnoro akwo luŋ yeŋ.

¹⁷Tic a Rwot luŋ tye atira, ginnoro luŋ ame en timo mar mom rwenyo iye,

¹⁸Rwot ceggi acega baŋ jo luŋ ame kok baŋe, jo ame kok baŋe iyi ateni.

¹⁹En cobo miti a jo luŋ ame lwore, dok daŋ winyo kokogi, te larogi.

²⁰Rwot gwoko jo luŋ ame mare, ento otim tim areco luŋ en bino nekogi oko.

²¹An abino pako gira Rwot kare ducu me ginnoro akwo luŋ pak nyiŋe nakanaka.