Read lango Jabuli 146 Bible Online

Jabuli 146 - lango bible

Jabuli 146

¹Pak wunu Rwot. Pak wunu Rwot, yin tipona!

²Abino pako Rwot pi kare me kwona luŋ, abino wero wer me pako Obaŋana kun pwod akwo,

³Kur ibed keto genwu i kom rwode, kur iket genwu i kom dano amwa-ni ame mom romo konyowu kede ginnoro.

⁴Ame ka kwo mere oya oko i kome dok oko i lobo, yikkere luŋ ame yam en oyiko te gik luŋ karacel kede i ninonono ikome.

⁵Dano ame nwoŋo kony i baŋ Obaŋa a Yakobo tye kede winyo, ame gennere tye i kom Rwot Obaŋa mere,

⁶ame oketo polo kede lobo kede nam, kede jami luŋ ame tye i yigi, ame gennere mom rwenyo kadi acel

⁷ame ŋolo kop a jo ame owuno kakare, dok mio cam baŋ jo ame kec nekogi. Rwot gonyo jo ame otweo oko i ot kol,

⁸en yabo waŋ jo ame waŋgi oto, Rwot mio jo ame piny oloo ya malo, en maro jo ame kitegi atira.

⁹Rwot gwoko arok ame bedo i lobo a jo ocele, en konyo mon a coggi oto kede itino kic; ento yik a jo areco, en balo oko, mom te cobere.

¹⁰Rwot bino loc gire nakanaka, Obaŋani, yin Cion, perakino pi lwagi jo me kare ducu. Pak wunu Rwot!