Read lango Jabuli 147 Bible Online

Jabuli 147 - lango bible

Jabuli 147

¹Pak wunu Rwot. Pien wero wer me pako Obaŋa, ber, wero wer me pake, ber, pien en obedo akica,

²Rwot tye ka gero Jerucalem odoco; en coko jo Icrael ame yam okeketa atata dwokogi cen paco.

³Jo ame cunygi cwer, en caŋogi, dok daŋ tweo waŋ burgi.

⁴En moko wel acer ducu, dok daŋ cakki ŋat acel acel i akinagi nyiŋe.

⁵Rwotwa dwoŋ dok tek meicel; niaŋŋere tut a mom kobbere.

⁶Rwot tiŋo jo ame onyono piny malo, otim tim areco, en retogi piny i lobo.

⁷Wer wunu wer me pwoyo Rwot, wer wunu wer me pako Obaŋawa, kun igoo wunu agoa i naŋa opuk,

⁸En wumo polo oko kede pol, en yiko kot ame cwe i lobo, dok en mio lum doŋo i lobo obedo kidikidi.

⁹En mio leyi me tim camgi, dok pito daŋ itino agak ame kok baŋe,

¹⁰Teko aguragura mom en a yomoro cunye, akadi tyen dano ame aŋwec daŋ mom yomoro cunye;

¹¹Ento Rwot cunye yom i kom jo ame lwore, kede i kom jo ame geŋo mar a mom lokere,

¹²Pak Rwot, yin Jerucalem! Pak Obaŋani, Yin Cion!

¹³Pien en ame mio nyony me cego doggolani bedo atek, dok en daŋ ame mio itinoni gum.

¹⁴En ame mio kuc bedo tye i waŋ apokki me loboni, dok en ame daŋ piti kede ŋano aber ame kato luŋ.

¹⁵En amio cikkere i lobo, koppere dwir meicel.

¹⁶En mio pee makere atar calo yer romo, dok keto bwo pee oko atata calo buru.

¹⁷En cwalo pee piny, calo kwon ame oŋiŋido, na ame twero cuŋ i ŋico ame en ocwao?

¹⁸En a daŋ cwao koppere te miyo pee meye oko, miyo yamo kodo, pii te mol oko.

¹⁹En kobo koppere baŋ Yakobo, cikkere luŋ kede ginnoro luŋ ame en ociko, en tito baŋ jo Icrael.

²⁰En mom obedo tic i rokkoro ocele kittono, mom tye rokkoro ocele ame ŋeo gin ame en ociko luŋ, Pak wunu Rwot.