Read lango Jabuli 17 Bible Online

Jabuli 17 - lango bible

Jabuli 17

¹Kwac ame Daudi okwao. Winy kokona, Ama Rwot, pien koppa tye atir, cik yiti iwiny kwacca, ame aya i doga kun goba mom iye.

²Tim ber imia aloo kop, yin en ineno gin ame tye atira.

³Ka ce iŋio cunya, ka ce ilima dyewor, kadi bed itema kede diro, mom gire ibino nwoŋo ni atimo timmoro arac, kop ame ya i doga daŋ mom tye iye balloro.

⁴Aco kop a dok i kom tic a dano, an alubo kop ame ya i dogi, mom alubo tim otim tim me byemi atwal,

⁵An alubo yoni keken, tyena mom ru ocer teŋe kadi acel.

⁶An akok gira baŋi, Ama Obaŋa, pien ibino gamo doga, cik yiti iwiny koppa.

⁷Nyut marri a mom lokere i yore me awura, yin en ame ilaro jo ame yenyo ka larre, i ciŋ okworgi, i ŋeti tuŋcem.

⁸Gwoka kite ame igwoko kede toŋ waŋi, kana i tipo me bwomi,

⁹i ciŋ jo areco ame yako limma, ame gin twon okworra atek meicel, ame ogura dyere.

¹⁰Kica moro doŋ mom i cunygi, pien ocule oko, okobo kop ame owakere awaka.

¹¹Obedo libba i kabedo ducu, aman doŋ ogura oko dyere, waŋgi ocikere acika i koma meretta piny.

¹²Ocalo doŋ eŋatu owor ame cunye apupuka apuka, me mako gi-acama mere, ocalo atin eŋatu ame tye opono me libo jo.

¹³Ya malo, Ama Rwot, me irwatte okworra, lweny kedgi me ilogi oko. Lar kwona i ciŋ jo areco, kede pala me lwennyi.

¹⁴Lara i ciŋgi kede twerri, Ama Rwot, lara i ciŋ jo ame doŋ onwoŋo jami ame cunygi mito oko i kwo man. Migi oyeŋ i gin ame yam ikano pirgi; mii itinogi nwoŋ adoŋ okato kare; mii moro doŋ pi ikwaegi daŋ,

¹⁵Aco an gira, abino ciko waŋa komi, kun kitena atira; ka aco i waŋ nino, neno calli bino miya yomcuny.