Read lango Jabuli 18 Bible Online

Jabuli 18 - lango bible

Jabuli 18

¹Baŋ adwoŋ wer: Wer a Daudi ame obedo amiro a Rwot, ame owero kop ame tye i werrere-ni baŋ Rwot, i nino ame Rwot rik olarre iye i ciŋ okworrere luŋ, kede i ciŋ Caulo. En rik okobo ni: Amari gira, Ama Rwot, pien yin en ibedo tekona,

²Rwot gire en obedo ka larrena atek meicel, en tek kato kidi oko, Obaŋana obedo twon kidi moro atek odoco, ka alaro baŋe ginnoro mom doŋ guda. En geŋo koma calo kwot; en ka larrena atek meicel ame ariŋo alaro.

³An gira acwalo dwona baŋi, yin Rwot, yin en a myero paki, yin en ilarra i ciŋ okworra.

⁴Pien biamwonyi me to onwoŋo doŋ ogura oko dyere, biamwonyi me to onwoŋo doŋ ocorre oko i koma.

⁵Tol me Ceol onwoŋo doŋ olida ame ka weo pe, kun owic a to daŋ doŋ tye oterre oko i nyima.

⁶An gira acwalo dwona baŋi, Ama Rwot ka atye i peko, an gira acwao dwona baŋi me konya, yin Obaŋa, En winyo dwona i ode, kokona owinyere i yite.

⁷I kare-nono lobo oyeŋere te wirre, acakki te kiddi daŋ oyeŋere kun myel i kirkir, pien akemo onwoŋo omako Rwot.

⁸Yito oduny malo kun donyo wume, twon maccoro alyet te donyo doge, kede lodi mac okur atek.

⁹Odio polo odwoko piny, en te bino piny; kun piny col icuc i te tyene piny.

¹⁰En otwarre obino piny kun obedo i ŋe okerubi; yamo te ru riŋo kede oko piny.

¹¹En te miyo piny acol wumere oko ipuk; eka pol apek obedo pii keken te doko kema mere.

¹²Tuŋ nyime onwoŋo ler alera, pee kede lodi mac okur te ya i pollere-nono.

¹³Dwon Rwot te mwoc i polo; dwon ŋat Amalo Meicel te winyere; pee kede lodi mac okur te corre piny.

¹⁴Obao atero mere, okworrere te ket atata; omio lutkot owil, co te ket i ŋwec.

¹⁵Pii i dye nam opokere, tere te nen; acakki te lobo te doŋ olaŋara; i kare ame Rwot ojuko okworrere, kun weo me wume kuto komgi.

¹⁶Rwot ocwao bade i polo, te mako ciŋa, en te waya en te waya oko i twon pi moro atut.

¹⁷En te larra oko i ciŋ jo atek ame daga; i ciŋ okwor ame onwoŋo mom aromo loyo.

¹⁸I kare ame atye kede can, gin ocako lweny i koma, ento Rwot gire te gwoka.

¹⁹Rwot olarra okela kan alac, pien cunye onwoŋo yom i koma,

²⁰Rwot omia mot me pwoya arom aroma i kitena atira, omia winyo pien yia gira ler.

²¹An abedo lubo gira gin a Rwot mito, mom ru atimo ginnoro arac ame poka kede Obaŋa.

²²Pien gin ame en ociko luŋ tye i nyima, dok daŋ mom ru akwero lubo icwillere moro.

²³En oneno ni an a mom i balloro, agwokere gira i timo gin arac.

²⁴Mannono omio Rwot omia mot me pwoya, pien oneno ni kitena atira dok oneno ni an yia ler.

²⁵Yin Rwot ame inyutte keni baŋ jo a genne ni yin igenne, dok daŋ inyutte baŋ jo a yigi ler ni yin yii ler.

²⁶Jo a kitegi beco yin inyutte baŋgi ni iber, eka baŋ jo a yigi col ite nyutto baŋgi ni yin itek.

²⁷Yin giri ilaro jo ame mwolle i nyimi; ento iciko waŋi i kom wegi abwone me iwagi idwoggogi piny.

²⁸Yin giri ibedo tarana ame menya, Ama Rwot, Obaŋana gire en a menyo piny acol ame atye iye

²⁹Yin en imia teko me loyo okworra; kadi ocokere me lweny i koma; Obaŋana gire en amia teko me pye kalo cel.

³⁰Gin ame Obaŋa-ni timo, ber meicel, gin a Rwot ociko cobere kakare. En tye acalo kwot me geŋo kom jo luŋ; ame riŋo laro baŋe.

³¹Ŋa kara ame dok obedo Obaŋa, mom Rwot keken? Ŋa ame dok calo kidi, mom Obaŋawa keken?

³²Obaŋa-nono en ame ruka kede teko, en a mia awoto i kuc.

³³En mio tyena bedo calo tyen atil; en ame mia acuŋ atek i wi kidi malo,

³⁴En a pwonya i kite me lweny; ame mia atwero telo akud atero me mola.

³⁵Yin doŋ ityeko miya kwot me larre, kony ame imia omio adoko twon lo moro adwoŋ,

³⁶Imio kakara obedo alac; omio tyena mom ocer.

³⁷Aryemo okworra ate makogi oko; akumo i komgi aboŋo weo naka ka gin otum.

³⁸Aonyogi luŋ piny ame mom dok oromo ya; co oradde atata i te tyena piny.

³⁹Pien yin imia teko me lweny, imia aloo okworra oko,

⁴⁰Imio okworra omukere oko i nyima ote loka ŋegi; jo ame daga doŋ atyeko oko iweŋ.

⁴¹Otemo yenyo ŋat a myero konygi, cite mom onen; okok-gu baŋ Rwot, cite mom ogamo doggi.

⁴²Aŋinyogi apwot calo apua ame yamo akolo, ajejebogi odoco calo coto ame onyonyono i dye yo.

⁴³Yin en a rik ilara i baŋ jo ojem; ite gwoka calo aloc i wi rok apapat; jo a yam mom aŋeo doŋ i te locca.

⁴⁴Tekki owinyo kop i koma ote cako wora oko; rok ocele luŋ obino te ryebere piny i nyima.

⁴⁵Gin luŋ oonyo toŋigi piny, ote wote i ka-ponogi i myelkom

⁴⁶Rwot akwo en kidi atek me larrena, myero pwoc! Obaŋana en a gire lara. Myero rab pi dittere.

⁴⁷Obaŋana en omio aculo kworra, en omio rok luŋ odok i te locca,

⁴⁸dok okwanya i ciŋ okworra, yin en a rik itiŋa malo i wi okworra, yin a rik ilara i ciŋ obyemi.

⁴⁹Man omio an gira abino pwoyi akina orok; dok abino wero wer me pako nyiŋi, Ama Rwot.

⁵⁰Obaŋa gire mio twon loc adwoŋ meicel baŋ abaka mere; en nyuto marrere a mom lokere baŋ ŋat a en oyero, baŋ Daudi kede baŋ i kwae waŋ i waŋ.