Read lango Jabuli 19 Bible Online

Jabuli 19 - lango bible

Jabuli 19

¹Baŋ adwoŋ wer: Man wer a Daudi. Polo kede jami iye nyuto kwogo Obaŋa, polo nyuto tic ame en otio kannaler.

²Nino acel acel rabo kwogo Obaŋa baŋ nino a lube, dyewor acel acel daŋ kobbi dyewor ocele.

³Mom tye dwonnoro ame winyere, mom gire okobo kopporo kadi acel;

⁴aco ennono dwongi winyere aloŋo i wi podo luŋ, kop ame gin kobo tuno naka iyi agikki piny. Obaŋa oketo kema me bedo a ceŋ malo kuno,

⁵ame pelo iye calo anyom ame oya i ode; cobo wottere i yomcuny calo twon lo moro atek meicel.

⁶Ya i polo tuŋ cel, te wot naka tuŋ ocele; mom tye ginnoro ame lyeto mere mom gudo.

⁷Cik a Rwot ber, dok tye atira, roco kwo a dano doko anyen; gin ame Obaŋa ociko genne gire, mio ŋat a mom i ŋeccoro doko ŋat a ryek.

⁸Pwony a Rwot atira, yomoro cuny dano; cik a Rwot ber odoco, niaŋo dano aber,

⁹Lworo Rwot ber, perakino gire atwal; cik a Rwot luŋ ateni, dok bedo arom aroma kare luŋ.

¹⁰Pire tek kato jabu oko, kadijabu ame olio acil rom mene; dok alim kato kic oko, kadi bed en a pwod aton atona i pedo kic,

¹¹Medo i mannono, gin en a kwenyoro an amironi; ŋat ame gwoko cikki nwoŋo mot adwoŋ.

¹²Ŋa kara ame romo ŋeyo ballere kene? Lara i bal luŋ ame opono.

¹³Gwoka i kom bal ame ya pi awaka, kur iwek loa, bino miyo abedo aboŋo balloro i koma, dok kun mom atimo twon balloro adwoŋ.

¹⁴Mi kop ame ya i doga, kede tammoro luŋ ame tyei cunya, obed gin ame yin ipwoo, Ama Rwot, yin i ka-larrena, dok yin daŋ en ilara.