Read lango Jabuli 2 Bible Online

Jabuli 2 - lango bible

Jabuli 2

¹Piŋo orok tye ka poro kop me jem? Piŋo rok tye ka poro kop a tere pe?

²Rwode me lobo doŋ otere oko, oloc tye ka poro kop karacel, i kom Rwot kede ŋat ame en oyero, kun okobo ni,

³“Ocod wunu nyorgi ame otweowa kede oko, okwer wunu locgi oko.”

⁴Rwot tye ka nyero anyera i wi kom loccere i polo, en tye ka ŋalogi aŋala.

⁵Tye ka kop kedgi akemo, Twon akemo mere agwa omio lworo omakogi, kun en kobbigi ni,

⁶“An doŋ atyeko keto abakana, i wi kidina acil me Cion.”

⁷Abino rabo cik a Rwot, ame en otyeko kobba, kun kobo ni, “Yin ibedo woda, ame tin doŋ anywali.

⁸Kwaa, an abino miyi rok luŋ me bedo megi, dok lobo luŋ daŋ bino bedo megi.

⁹Ibino loyogi abiro nyonyo, ibino ŋidogi oko atitino acalo gulu.”

¹⁰Aman doŋ ba, wun oloc, bed wunu aryek, wun oloc me lobo, ka okwenyorowu, winy wunu.

¹¹Tiyi wunu Rwot, kun ilwore wunu, komwu myero myel kun irumo wunu coŋwu i nyime, naka mio akemo make, ite to wunu oko i yo; pien akemo make oyot meicel. Jo ame riŋo laro baŋe tye kede winyo.