Read lango Jabuli 21 Bible Online

Jabuli 21 - lango bible

Jabuli 21

¹Baŋ adwoŋ wer: Man en wer a Daudi. Amironi abaka lelo pi tekoni, Ama Rwot; kony ame imie yomoro cunye nadi!

²Yin doŋ imie gin ame cunye mito, dok mom ikwero kwaccere.

³Iŋolo wie i mot abeco meicel, iketo tok kwogo me jabu i wie.

⁴En okwai ni imie kwo ame daŋ ite miye, imie kwo ame perakino waŋ i waŋ.

⁵Kwogo mere dwoŋ meicel pi kony ame imie, imie kwogo kede loc,

⁶Yin doŋ imie gum atwal, cunye yom pien yin itye kede.

⁷Pien amironi abaka geŋo Rwot; pi mar a mom lokere ame Ŋat Amalo Meicel tye kede i kome, ginnoro gire mom bino core teŋe.

⁸Ciŋi bino gudo kom okworri luŋ, ciŋi me tuŋ cam bino mako jo luŋ ame dagi.

⁹Ibino lokogi odoko calo keno ame mac alyel iye, i nino ame ibino nen iye. Akemoni bino miyo inekogi oko, mac bino, waŋogi oko,

¹⁰Ibino tyeko ikwae luŋ i lobo, karacel kede itino mere i akina jo.

¹¹Ka ce gin oyikere me timo ginnoro arac i komi, akadi oyikere me timo tim me idwali, yikgi mom bino cobere.

¹²Pien ibino miyogi omukere oko i ŋwec, ateroni bino pimo nyimgi ikokome.

¹³Odwori pi tekoni, Ama Rwot! Wan obino wer kun opako twerri.